Дүртөйлөләр Фидан Ғафаров иҫтәлегенә музей бүлмәһен асты
Иҫке байыш ауылында “Айыҡ ауыл” республика конкурсының төбәк этабы сиктәрендә “Быуындарҙың көмөш сылбыры” тигән сара үтте
18 февралдә Дүртөйлө районының Иҫке Байыш ауылында “Айыҡ ауыл” республика конкурсының төбәк этабы сиктәрендә “Быуындарҙың көмөш сылбыры” тигән сара үтте.
Тәүҙә дүртөйлөләр ҡунаҡтарҙы был тарафтарҙа урынлашҡан Әүлиә тауы менән таныштырҙы. Һуңынан саралар ауыл мәҙәниәт йорто алдында дауам итте. Унда ҡунаҡтарҙы “Иҫке Байыш ауылының барлыҡҡа килеү тарихы” тип исемләнгән театрлаштырылған тамаша менән ҡаршыланылар. Ҡыҫҡаса әйткәндә, ауылға нигеҙ һалған Байыштың яҡты донъяға ауаз һалған мәлен театрлаштырылған тамашала күрһәттеләр.
Артабан “Ете егет” проекты сиктәрендә йәштәр өсөн “Байыш батыры” бәйгеһе ойошторолдо. Унда башҡорт батырҙарынан торған команда вәкилдәре милли спорт төрҙәре буйынса көс һынашты - бүрәнә этеү, уҡтан атыу, суҡмар ташлау, утын бысыу кеүек ярыштарҙа уҙышты.
Мәҙәниәт йорто фойеһында “Алтын ҡулдар” проекты сиктәрендә һөнәрселәр күргәҙмәһе ойошторолған ине. Унда ауылдың уңғандары төрлө ҡул эштәрен, һүрәттәрен, тәмле ризыҡтарын күрһәтте.
“Айыҡ ауыл” конкурсы сиктәрендә РФСФР-ҙың, Башҡортостандың һәм Татарстандың халыҡ артисы Фидан Ғафаров иҫтәлегенә музей бүлмәһе асыу тантанаһы ла үтте. Уны булдырыуҙа артистың улы – Башҡортостандың халыҡ артисы Азамат Ғафаров ярҙам иткән, атаһының наградаларын, шәхси әйберҙәрен биргән.
Ҡунаҡтарҙы, ауылдаштарын тәбрикләп Иҫке Байыш ауыл биләмәһе башлығы Илдус Хәмиев сығыш яһаны.
– Иҫке Байыш ауылы уңған халҡы, билдәле шәхестәре менән дан тота. Ауылда эшләү һәм йәшәү өсөн бөтә уңайлыҡтар булдырылған. Балалар баҡсаһы, урта мәктәп, мәҙәниәт йорто һәм китапхана, табип амбулаторияһы, аҙыҡ-түлек һәм көнкүреш кәрәк-яраҡтарын һатҡан өс кибет бар. Шулай уҡ ҡарттар һәм инвалидтар өсөн барлыҡ уңайлыҡтары булған йорт-интернат эшләй, – тип ауылдың көнитмеше менән таныштырҙы ул.
“Айыҡ ауыл” республика конкурсы сиктәрендә Иҫке Байыштар бер нисә проект башлап ебәргән. Шуларҙың береһе – социаль селтәрҙәрҙә ауылдаштары, Башҡортостандың халыҡ сәсәне Фәррәх Дәүләтшин әҫәрҙәрен яттан һөйләү. Был сарала 150-гә яҡын кеше ҡатнашҡан, һәм әйтергә кәрәк, улар араһында Дүртөйлө районынан ғына түгел, республикабыҙ һәм Рәсәйҙең төрлө мөйөштәренән, хатта Ҡазағстандан да булғандар.
Был көндө билдәлдәле сәсәнгә һәм башҡа арҙаҡлы яҡташтарына арнап, Иҫке Байыш ауылы тарихы буйынса квест ойошторолдо. Унда өс команда – “Мишәрҙәр”, “Ҡармандар”, “Рәсмәкәйҙәр” көс һынашты. Улар викторина һорауҙарына яуап бирҙе, “Фәррәх уҡыуҙары” проекты сиктәрендә шағирҙың шиғырҙарын яттан уҡыны, Фидан Ғафаровтың репертуарынан йырҙар башҡарҙы. Шулай уҡ Азамат Ғафаров та атаһының йырын яҡташтарына бүләк итте.
Ауылдаштарын был проектта ҡатнашыуҙарын хуплап БР Дәүләт Йыйылышы – Ҡоролтай депутаттары Фәрит Ғүмәров, Альберт Дәүләтбаев сығыш яһаны.
Сараның махсус ҡунағы Башҡортостандың халыҡ сәсәне Розалиә Солтангәрәева ҡобайыр башҡарҙы. Бөтә донья башҡорттары ҡоролтайы Башҡарма комитеты ағзаһы, Ғаиләгә булышлыҡ итеү, әсәлекте һәм балалыҡты яҡлау буйынса “Мираҫ” хәйриә фонды Советы рәйесе Сәлиә Мырҙабаева “Айыҡ ауыл” конкурсының әһәмиәте тураһында һөйләне.
Район этабында еңеүсе һәм “Өлгөлө башҡорт ғаиләһе” конкурсының республика этабында ҡатнашыусы Ғәҙелшиндар ғаиләһе тураһында, “Әүлиә-тау – теләктәрҙә үтәү урыны” проекты буйынса видеояҙмалар күрһәтелде.
Был көндө йәмәғәт эшендә әҙем ҡатнашҡан Иҫке Байыш йәмәғәтселәренә рәхмәт хаттары тапшырылды. Шул иҫәптән Дүртөйлө районы хакимиәте башлығы Риф Йосопов конкурста еңгән командаларҙы бүләкләне, ә "Байыш батыры" еңеүселәрен БР Көс экстримы федерацияһы президенты Денис Ваһапов тәбрикләне.
Ауыл халҡын яңы еңеүҙәргә, изге эштәргә илһамландырған был сара Иҫке Байыш ауылына бағышланған йыр-гимн менән тамамланды.
Рәмилә Мусина фотолары.
