Бугюн бизин белгили ва гьюрметли адамыбыз, «Ёлдаш» газетни баш редактору, Дагъыстанны халкъ язывчусу, драматург, шаир ва публицист Гебек Къонакъбиев оьзюню 65 йыллыгъын къаршылай.
Г. Къонакъбиев — оьзюню иши ва яратывчулугъу булан Дагъыстанны маданият ва жамият яшавуна бек таъсир этеген адам. Ону шиърулары терен маъналы, публицист гьисапда буса агьамиятлы агьвалатланы суратлай, халкъны пикрусун къурувда ва миллет адатларыбызны сакълавда кёп гьаракат эте.
«Ёлдаш» газетни баш редакторуну къуллугъунда Гебек Къонакъбиев республиканы маълумат майданын беклешдирмек учун талмай чалыша, мухбирликни ва маданиятны гьар заман бийик даражада тута. Ону касбу усталыгъы иш ёлдашларыны ва охувчуланы арасында уллу гьюрмет къазангъан.
Биз Г Къонакъбиевге гьакъ юрекден къатты савлукъ, битмейген илгьам, янгы адабият уьстюнлюклер ва агьлюсюнде парахатлыкъ ёрайбыз. Гьар гюню сююнчлю болсун, пагьмусу буса Дагъыстанны ва халкъыбызны пайдасына дагъы да узакъ йылланы боюнда къуллукъ этсин!
"Ёлдаш" газетни коллективи.
