Իրանի արտաքին գործերի նախարար Աբբաս Արաղչին փետրվարի 16-ին հանդիպել է ՄԱԿ-ի միջուկային վերահսկողության գործակալության ղեկավար Ռաֆայել Գրոսիի հետ՝ Թեհրանի միջուկային ծրագրի շուրջ ԱՄՆ-ի հետ բանակցությունների երկրորդ փուլից առաջ, հայտնել է Associated press-ը:
Արաղչին Գրոսիին ասել է, որ կհանդիպի նաև Օմանի արտաքին գործերի նախարար Բադր ալ-Բուսաիդիի հետ, որը երեքշաբթի օրը Ժնևում հյուրընկալում է ԱՄՆ-Իրան բանակցությունները։
Պետական հեռուստատեսությունը հաղորդել է, որ ԱՄՆ նախագահ Դոնալդ Թրամփը տարածաշրջան լրացուցիչ ավիակիր ուղարկելու հրաման է տվել, իսկ Իրանը երկուշաբթի օրը անցկացրել է ևս մեկ ռազմածովային զորավարժություն։ Այնտեղ ասվում է, որ զորավարժությունները կփորձարկեն Իրանի հետախուզական և գործառնական կարողությունները Հորմուզի նեղուցում, Պարսից ծոցում և Օմանի ծոցում։
Նախորդ բանակցային փուլը տեղի էր ունեցել փետրվարի 6-ին Օմանի միջնորդությամբ՝ այդ երկրի մայրաքաղաք Մասկատում:
Ավելի վաղ ԶԼՄ-ները հայտնել էին, որ ԱՄՆ նախագահը դիտարկում է Իրանի դեմ ուղղված տարբերակներ, որոնք ներառում են անվտանգության ուժերին և առաջնորդներին թիրախային հարվածներ հասցնելը ցուցարարներին ներշնչելու համար։ Հունվարի 26-ին հայտնի էր դարձել, որ ԱՄՆ ռազմածովային ուժերի USS Abraham Lincoln ավիակիրը և օժանդակ նավերը հասել ենՄերձավոր Արևելք։ Թրամփը հայտարարել էր, որ «հսկայական նավատորմ է շարժվում դեպի Իրան»։
ԱՄՆ պետքարտուղար Մարկո Ռուբիոն հայտարարել էր, որ ԱՄՆ-ի և Իրանի միջև էական բանակցությունները, միջուկային հարցից բացի, պետք է ներառեն նաև Իրանի հրթիռային ծրագիրը, Թեհրանի աջակցությունը Մերձավոր Արևելքի խմբավորումներին և «սեփական ժողովրդի նկատմամբ վերաբերմունքը»։ Իրանական կողմը պնդում է, որ բանակցությունների ժամանակ կքննարկեն միայն Թեհրանի միջուկային ծրագիրը։
Նորություններին հետևեք մեր կայքում, ինչպես նաև Telegram-ում և YouTube-ում