Արցախի հայաթափման հետ միաժամանակ Հայաստանը սառեցրել է Արցախի անունով բացված բանկային հաշիվները, որի հետևանքով մինչև այսօր հնարավոր չէ վճարել ավելի քան 22 հազար աշխատողների չվճարված աշխատավարձը, վերջնահաշվարկները և արձակման նպաստները, հայտարարել է Արցախի օպերատիվ շտաբը՝ արձագանքելով քաղաքացիների դիմումներին։
Ըստ հրապարակման՝ հարցը բազմիցս ներկայացվել է ՀՀ կառավարությանը, սակայն մինչև օրս որևէ լուծում չկա:
2023 թվականի հոկտեմբերի 1-ից աշխատանքից ազատված աշխատողների վերջնահաշվարկները և արձակման նպաստները կազմել են ավելի քան 5 միլիարդ դրամ, իսկ 2023 թվականի սեպտեմբեր ամսվա չվճարված աշխատավարձը` ավելի քան 550 միլիոն դրամ։
Աշխատանքի և սոցիալական հարցերի նախարարի տեղակալ Նվեր Կոստանյանն Armenia Today-ին հայտնեց, որ հարցը իրենց նախարարության լիազորությունների շրջանակում չի, քանի որ աշխատանքային հարաբերությունները ՀՀ օրենսդրությամբ չեն ծագել։
2023 թվականի հուլիսի 11-ին «Հրապարակը» հայտնել էր, որ արցախցիները, ովքեր չեն նախատեսում ՀՀ քաղաքացիություն ստանալ, կենսաթոշակային խնայողություններ ստանալու համար հնարավոր է դիմեն դատարան։ Հուլիսի 4-ին Արցախի ՄԻՊ Գեղամ Ստեփանյանը տեղեկացրել էր, որ ՀՀ-ում կենսաթոշակի հաշվարկման ընթացքում արցախցիների 1992-2014թթ․ աշխատանքային ստաժը չի հաշվարկվում։ Հունիսի 13-ին ԱԺ-ն հաստատել էր աշխատող արցախցիների կուտակային կենսաթոշակների համակցումը ՀՀ-ի համակարգի հետ։