Алдан белеү яҡшыраҡ
Йыл башынан алып Башҡортостанда 220 меңдән ашыу кеше медицина тикшереүе үткән.
Ағымдағы йыл башынан алып Башҡортостанда 196 605 кеше – диспансеризация, ә иҫкәртеү медицина тикшереүен 24 776 кеше үткән, тип хәбәр иттеләр Һаулыҡ һаҡлау министрлығынан. Тикшереүҙәр “Оҙайлы һәм әүҙем тормош” милли проекты (национальный проект “Продолжительная и активная жизнь”) бурыстарына ярашлы үткәрелә.
Төп күрһәткестәрҙе үлсәү, ЭКГ, флюорография, маммография, шулай уҡ табиптар консультацияһын үҙ эсенә алған комплекслы тикшереүҙәр барышында ауырыуҙарҙы иртә стадияла асыҡларға һәм хроник ауырыуҙар ваҡытында дөйөм һаулыҡ торошон баһаларға мөмкин.
2025 йылдан ил халҡы шулай уҡ репродуктив һаулыҡ диспансеризацияһын үтә ала. Беренсе этапта ир-егеттәр һәм ҡатын-ҡыҙҙар репродуктив һаулыҡ хәүефе факторҙарын асыҡлау өсөн анкета үтә һәм табиптар менән кәңәшләшә. Акушер-гинекологтар һәм урологтар йөклөлөккә һәм бала табыу мөмкинлегенә йоғонто яһаусы ауырыуҙарҙың проблемаларын һәм билдәләрен асыҡлай. Был төр тикшереүҙе йыл башынан алып 45 007 пациент үткән. Бынан тыш, быйылдан ҡатын-ҡыҙҙарҙа кеше папилломаһы вирусы биш йылға бер тапҡыр билдәләнә.
Шуны билдәләп үтәйек, өлкәндәрҙең ҡайһы бер төркөмдәрен профилактик медицина тикшереүе һәм диспансеризациялау барышында тәүге тапҡыр 29 386 сир асыҡланған. Ҡан әйләнеше системаһы ауырыуының беренсе урынында, икенсе урында — аш һеңдереү ағзалары, өсөнсөлә — тын алыу ағзалары.
“Оҙайлы һәм әүҙем тормош” милли проектының төп маҡсаты — граждандарҙың оҙон ғүмерлелегенең яңы күрһәткестәренә өлгәшеү. 2030 йылға көтөлгән ғүмер оҙайлығын 78 йәшкә тиклем, ә 2036 йылға 81 йәшкә тиклем арттырыу планлаштырыла. Милли проект ярҙамында медицина учреждениелары яңыртыла, реабилитация системаһы камиллаштырыла, милли тикшеренеү үҙәктәре селтәре үҫешә, һаулыҡ һаҡлауҙы һанлаштырыу буйынса эш алып барыла. Яңыртылған милли проекттар РФ Президенты Владимир Путин ҡарары буйынса 2025 йылдан тормошҡа ашырыла.
Фото: "Башҡортостан" ДТРК-һы.