Өфөлә халыҡ-ара форум-күргәҙмә үтә
“УралСтройИндустрия” форумы барышында Рәсәй Төҙөлөш һәм торлаҡ-коммуналь хужалыҡ министрлығы университетының Мәғлүмәт моделен әҙерләү институты эксперттары практика үткәрәсәк. Ул смета нормалары һәм хаҡтар билдәләүҙәге үҙгәрештәрҙе ентекле өйрәнеүгә, төҙөлөш ойошмаларының көндәлек эшендә ҡулланыуға йүнәлтеләсәк.
«Йәшәү өсөн инфраструктура» милли проекты (национальный проект «Инфраструктура для жизни») маҡсаттарына ярашлы, 25-27 февралдә Башҡортостан Республикаһында «УралСтройИндустрия» халыҡ-ара форум-күргәҙмәһе үтә. Был хаҡта төбәктең Төҙөлөш һәм архитектура министрлығынан хәбәр иттеләр.
«Сарала ҡатнашыусылар Рәсәй Төҙөлөш министрлығы ғәмәлгә ашырған норматив базаға һәм методикаларға үҙгәрештәр индереү, 2026-2027 йылдарға смета нормаһын үҫтереүҙең өҫтөнлөклө йүнәлештәре, төҙөлөштөң смета хаҡын формалаштырғанда өҫтәлгән хаҡҡа һалым ставкаһын иҫәпкә алыу үҙенсәлектәрен һәм башҡаларҙы тикшерә. Сара төҙөлөш һәм проект компаниялары етәкселәре, төҙөлөш һәм проект ойошмалары ағзалары, дәүләт һәм муниципаль заказсылар вәкилдәре өсөн көнүҙәк буласаҡ», - тип билдәләне Башҡортостандың төҙөлөш һәм архитектура министры вазифаһын башҡарыусы Артем Ковшов.
Шулай уҡ форум барышында Рәсәй Төҙөлөш һәм торлаҡ-коммуналь хужалыҡ министрлығы университетының Мәғлүмәт моделен әҙерләү институты эксперттары практика үткәрәсәк. Ул смета нормалары һәм хаҡтар билдәләүҙәге үҙгәрештәрҙе ентекле өйрәнеүгә, төҙөлөш ойошмаларының көндәлек эшендә ҡулланыуға йүнәлтеләсәк. Практик өлөшө 2026 йылда өҫтәлгән хаҡҡа һалым ҡулланыуға, смета документацияһының, килешеү шарттарының һәм бухгалтер иҫәбенең үҙ-ара бәйләнешенә һәм башҡа мәсьәләләргә арнала.
«Йәшәү өсөн инфраструктура» милли проектының маҡсаты – тораҡ пункттарҙы комплекслы үҫтереү. Улар – торлаҡ һәм юлдар төҙөү һәм ремонтлау, йәмәғәт һәм ихата киңлектәрен төҙөкләндереү, социаль һәм коммуналь инфраструктура булдырыу һәм уны яңыртыу, күсмә составты яңыртыу иҫәбенә йәмәғәт транспортының уңайлы маршруттары һанын арттырыу.
Яңыртылған милли проекттар Рәсәй Президенты Владимир Путиндың ҡарары буйынса 2025 йылдан тормошҡа ашырыла.
Фото: stroybvk.ru
Беҙҙең МАХ каналына https://max.ru/gazetabashkortostan ҡушылығыҙ!