Джойсик ярҙамында Тыуған илен һаҡлай
Был һөнәре тыныс тормошта ла кәрәк буласаҡ
“Спартак” позывнойлы яҡташыбыҙ беренсе класлы дрондар операторы. Техник оҫталыҡ, рух көсө заман армияһының алғы һыҙатына алып килә уны. Рәсәйҙең пилотһыҙ системалар ғәскәрҙәре өсөн уның кеүек белгестәр ныҡлы таяныс. Бөгөн “Спартак” Тыуған илде джойсик һәм видеокамера ярҙамында һаҡлай, иртәгә уның уникаль тәжрибәһе тыныс тормошта ла кәрәк буласаҡ.
Социаль селтәрҙәрҙә “Әбйәлил” гәзитен уҡыусылар йәш техниктар станцияһы эргәһендәге “Бөркөт” түңәрәгенән үҙенсәлекле посылка тураһында бәлки хәтерләйҙер. Уның етәксеһе Салауат Фазлетдинов һәм уҡыусыһы Арсен Шагалин үҙ ҡулдары менән самолет -разведчик ҡоралар һәм махсус хәрби операция биләмәһенә оҙаталар. Был аппарат “Спартак” позывнойлы МХО яугире үтенесе буйынса эшләнә. Ял ваҡытында һалдат йәш техниктар станцияһында булып, ошондай ғәҙәти булмаған заказды ҡалдыра. “Спартак” бөгөнгө көндә БПЛА операторы булып хеҙмәт итә.
Әбйәлил районының бәләкәй бер ауылында донъяға килә ул. Һуңынан Магнитогорск төҙөлөш-монтаж техникумын тамамлай, машинист һөнәрен ала. Армия тәжрибәһен пехота ғәскәрҙәрендә туплай.
Хәрби хеҙмәткә ул 2022 йылдың көҙөндә алына, Рәсәй армияһы сафына мобилизациялана. Хәрби күнекмәләрҙән һуң фронт юлы башлана. Бер саҡ разведка төркөмө командиры уға үҙен яңы өлкәлә, БПЛА операторы сифатында һынап ҡарарға тәҡдим итә. ”Спартак” бер ай дауамында инструктор етәкселегендә ялан шарттарында төплө уҡыу үтә һәм хәрби вахтаға баҫа. Ике йыл элек Рәсәйҙең Оборона министрлығы менән контракт төҙөй. Был эштә ниндәй сифаттар кәрәклеге менән тураһында унан ҡыҙыҡһындыҡ.
–Беренсенән, оператор компьютер техникаһын белергә тейеш. Уның ҡул моторикаһы ла яҡшы үҫешкән булыуы мөһим. Катографияла эшләү оҫталығы ла, түҙемле булыу ҙа кәрәк. Шулай уҡ информатика, математика, инглиз теле буйынса яҡшы белем талап ителә, – ти яугир.
“Спартак”тың яйға һалынған үҙенең ҡағиҙәләре бар: уға ышанып тапшырылған техниканы һәм боеприпастарҙы эш алдынан ентекле тикшерә. Барыһы ла сәғәт һымаҡ эшләргә тейеш. Артабан оператор үҙенең хәүефһеҙлеген дә хәстәрләп, дежурлыҡ эшенә тотона: разведка алып бара, мәғлүмәттәр тапшыра, маҡсаттар билдәләй, кәрәк икән һөжүм итә.
–Беҙ төрлө һауа шарттарында ла эшләйбеҙ, шулай ҙа иң ҡатмарлыһы – томанда эшләү. Алғы һыҙыҡтан яҡынса 1-6 километр йыраҡлыҡта урынлашабыҙ. Беҙҙең бурыс шулай уҡ штрурмлаусы төркөмдәрҙе оҙатып йөрөү. Беҙҙең оперативлыҡҡа күп кешеләрҙең ғүмере бәйле. Шуға ла айырыуса ныҡ йыйнаҡ һәм мобиль булыу мөһим, – ти әңгәмәсем.
Әйткәндәй, батырлығы өсөн ул Ҡаһарманлыҡ ордены менән бүләкләнгән. Тиҙҙән яугир ялға тыуған яҡтарына йыйына. Уны бында ғаиләһе көтә. Ял ваҡытында “Спартак” Асҡарҙа йәшәгән үҙ эшенең оҫтаһы булған Салауат Фәзлетдинов менән осрашырға, уға ярҙамы өсөн рәхмәт әйтергә ниәтләй.
БПЛА профессионал операторҙары рәтенә баҫырға теләүселәргә яугирҙең теләктәре ошондай:
-Иң мөһиме ҡурҡыуҙан ҡотолоғоҙ. Был һөнәргә үҙегеҙҙе алдан әҙерләгеҙ, карта менән эшләргә өйрәнегеҙ. Был перспективалы эш, тыныс тормошта ла был белемгә ҡулланыу табып буласаҡ, – тине ул.
Сығанаҡ: “Әбйәлил” гәзите.