2019 թվականից Մոսկվայում գործող Հայ մշակույթի ակադեմիան այսուհետ գործելու է նոր՝ Ֆռունզենսկայա նաբերեժնայա 8 հասցում։ Մոսկվայի սրտում գտնվող երկհարկանի, ընդարձակ, ժամանակակից դիզայնով և կահավորմամբ ակադեմիան հյուրերին դիմավորեց հայկական մթնոլորտում։ Բացման արարողությանը հրավիրվածների շարքերում էին սիրված հասարական և մշակութային գործիչներ, տեղաբնակ հայտնի հայեր։ Ներկաները ծանոթ էին ակադեմիայի գործունեությանը և Վարդուշ Յուրիի Կարեվայի կողմից Armca-յի հիմնադրման պատմությանը։
<<Ակադեմիան հիմնելու միտքն առաջացավ այն ժամանակ, երբ իմ երեխաները հասան մի տարիքի, որից սկսած պետք էր նրանց հայ մշակույթի, հայոց լեզվի զարգացման մասին հիմնարար գիտելիքներ տալ։ Ինչպես յուրաքանչյուր ծնող, այնպես էլ ես շատ էի ուզում ստեղծել մի մթնոլորտ, որտեղ երեխան հարմարավետ միջավայրում կսովորեր իր լեզուն, մշակույթը, պատմությունը, իսկ կրթությունը պետք է վարվեր որակավորված մասնագետների կողմից։ Ի սկզբանե և մինչ օրս ակադեմիայի զարգացման հարցում գերակայությունը տրվում է որակյալ կրթությանը>>,- մեզ հետ զրույցում ասաց Հայ մշակույթի ակադեմիայի հիմնադիր-ղեկավար Վարդուշ Կարևան։
Դասավանդվող հիմնական՝ hայոց լեզու, հայագիտություն, հայոց պատմություն առարկաներից զատ կան նաև վոկալի, պարի, դաշնամուրի, թմբուկի դասեր, որոնք փոխկապակցված են։ Եթե սանը դասի ընթացքում ծանոթանում է որևէ տոնի, ապա երգի, պարի դասաժամին սովորում է տոնական երգն ու պարը դրանով իսկ դառնալով ծիսակարգի կրողն ու տարածողը։
Կրթությունը էլ ավելի արդյունավետ դարձնելու համար դասասենյակները նախատեսված են մինչև տասը հոգու համար։ Ընդունելությունը կատարվում է երեք տարեկանից, իսկ ընդունելության առավելագույն շեմ գոյություն չունի։
<<Կրթօջախում ունենք հեռավար և առկա ուսուցում ռուսախոսների և հայախոսների համար։ Կոմպլեքս դասավանդման մեջ մտնում է հայոց լեզուն, հայրենագիտությունը, երգն ու պարը, իսկ մնացած ուղղությունները կարող են ընտրել։ Ակադեմիան կազմակերպում է տարբեր կրթական միջոցառումներ և բաց է ցանկացած համագործակցության համար>>,- անդրադառնալով Armca-յում դասավանդման ձևաչափին՝ ասաց ԲԳԹ, ՄՊԼՀ դոցենտ, Հայ մշակույթի ակադեմիայի առաջատար մասնագետ Արմինե Մարտիրոսյանը։
Հրավիրվածները ակադեմիայից նվերներով հեռանալու հնարավորություն էին ստացել։ Անհրաժեշտ էր գրանցվել, մասնակցել վիճակահանությանը և ստանալ կրթական և մշակութային ծրագրերին անվճար մասնակցելու հնարավորություն կամ տպագիր գրականություն։ Վիճակահանությունը կայացավ կրթօջախի նոր հասցեի շնորհանդեսի ավարտին, որով ներկաներից ոմանք հայոց լեզվի, պատմության, հայրենագիտության, ազգային պարերի մասնավոր դասընթացների փաթեթներ ստացան։ Նյութական նվերներներից զատ ներկաները վայելեցին ակադեմիայի ուսուցչուհիների կատարումը՝ իրենց հետ տանելով հայկական մշակույթից մի մասնիկ։
