Наталія МАЦКЕЛЬ – настаўнік беларускай мовы і літаратуры Сольскай сярэдняй школы імя Мар’яна Дуксы, у якой працуе 32 гады. На раённым этапе конкурсу прафесійнага майстэрства педагагічных работнікаў «Настаўнік года Рэспублікі Беларусь» у намінацыі «Русский язык и литература, белорусский язык и литература» Наталія Іосіфаўна стала пераможцай.
Наша гераіня нарадзілася і вырасла ў аграгарадку Кушляны. Бацькі былі звычайнымі вясковымі людзьмі, якія працавалі ў калгасе: мама – бухгалтарам, тата – вадзіцелем. Пасля заканчэння Кушлянскай васьмігадовай школы Наталія працягвала навучанне ў Сольскай СШ. Атрымаўшы сярэднюю адукацыю, яна рашыла паступаць у Гродзенскі дзяржаўны інстытут на выкладчыка беларускай мовы і літаратуры. Бацькі, асабліва мама, вельмі хацелі, каб абедзве дачкі атрымалі вышэйшую адукацыю. Да таго ж яны лічылі, што прафесія настаўніка – самая пачэсная і ганаровая.
Чаму наша гераіня выбрала менавіта гэту прафесію і гэты прадмет? Уплыў на дзяўчыну-падлетка аказала маладая энергічная настаўніца беларускай мовы і літаратуры Жанна Канстанцінаўна Радзевіч, якая прыйшла працаваць у Кушлянскую школу, калі Наталія вучылася ў 8 класе. Гледзячы з захапленнем на Жанну Канстанцінаўну, дзяўчына думала: «Хачу быць такой жа неверагодна прыгожай і цікавай настаўніцай». Гэта думка пасялілася ў галаве Наталіі. У 10 класе Сольскай СШ дзякуючы настаўніцы Таццяне Аляксееўне Фёдаравай яна цвёрда вырашыла, што будзе ў будучым выкладаць беларускую мову і літаратуру.
Пасля спробы (не прайшла па конкурсе) паступіць ў ГДІ Наталію запрасілі ў Кушлянскую школу працаваць піянерважатай. Мара быць настаўнікам перастала быць марай, яна стала ўжо мэтай. Праз год вырашыла падаваць дакументы ў Беларускі дзяржаўны ўніверсітэт. Прахадны бал быў вельмі высокім, удалося паступіць толькі на другі раз. Перад гэтым была грунтоўная падрыхтоўка да ўступных іспытаў, у час якіх Наталія з лёгкасцю адказвала на пытанні экзаменацыйных білетаў і па мове, і па літаратуры. У выніку, здзівіўшы членаў камісіі сваімі ведамі, была залічана ў БДУ.
Падчас навучання Наталія Іосіфаўна выйшла замуж, пасля трэцяга курса перавялася на завочное аддзяленне, уладкавалася на працу ў Сольскую СШ, дзе затрымалася на 32 гады. Настаўніца імкнецца прывіць любоў да беларускай мовы сваім вучням, ёй хочацца, каб яны актыўна размаўлялі на роднай мове. На занятках яна выкарыстоўвае розныя формы, метады, прыёмы працы, стараецца прымяняць новыя тэхналогіі, змяняе віды дзейнасці, каб дзеці не стамляліся і ім было цікава. Наталія Мацкель працягвае займацца самаадукацыяй: чытае метадычную літаратуру, наведвае семінары, перыядычна праходзіць курсы павышэння кваліфікацыі.
Вялікі вопыт прафесійнай дзейнасці стаў падставай для магчымасці прадэманстраваць яго іншым, паказаць свае здольнасці і навыкі. Таму, калі дырэктар Сольскай СШ імя Мар’яна Дуксы Павел Баляслававіч Савіцкі прапанаваў Наталіі Іосіфаўне паўдзельнічаць у конкурсе «Настаўнік года», яна згадзілася. Па словах нашай гераіні, самым складаным было выйсці з зоны камфорту. Яна ўдзячна калегам, якія падтрымалі яе і прыйшлі на дапамогу ў гэты няпросты перыяд.
Адзін з этапаў раённага конкурсу – правядзенне ўрока ў незнаёмым класе. Наталія Іосіфаўна хвалявалася, як спрацуюць вучні 8 класа СШ №7, у якім ёй давялося весці ўрок беларускай мовы. Дзякуючы таму, што перад заняткам у настаўніцы была магчымасць пазнаёміцца з вучнямі і наладзіць з імі кантакт, у нашай гераіні ўсё атрымалася. Калі яна даведалася пра перамогу, была ў прыемным шоку. «Але, напэўна, заслужыла», – усміхаецца субяседніца. Наперадзе – завочны этап абласнога конкурсу, да якога ўжо рыхтуецца канкурсантка.
У вольны час Наталія Мацкель любіць вандраваць па Беларусі. Разам з дачкой і зяцем яны садзяцца ў машыну і адпраўляюцца ў падарожжа. Размалёўка карцін па нумарах, тэатр, канцэрты, прагулкі на веласіпедзе, сустрэчы з сяброўкамі – тое, што дапамагае расслабіцца і атрымаць зарад энергіі.
Аксана ГЕЙБОВІЧ
Фота з архіва Наталіі МАЦКЕЛЬ
Теги: общество образование