Мәктәптәр һәм балалар баҡсалары арта
Февралдә Өфөлә Волга буйы федераль округында иң ҙур мәктәп эшләй башлаясаҡ.
2025 йылда республикала 4 065 уҡыусыға һәм 160 мәктәпкәсә йәштәге балаға иҫәпләнгән өс ҙур дөйөм белем биреү учреждениеһы төҙөлөп бөттө һәм файҙаланыуға тапшырылды. Был хаҡта Башҡортостан Башлығы Радий Хәбиров уҙғарған аҙналыҡ оператив кәңәшмәлә төбәктең мәғариф министры Илдар Мәүлетбирҙин хәбәр итте.
Мәҫәлән, 2026 йылдың ғинуар башында Өфө районының Шмидт ауылында Рәсәй Геройы Илдар Суфияров исемендәге Белем биреү үҙәге асылды. Был республикала дәүләт-шәхси партнерлыҡ механизмын ҡулланып төҙөлгән беренсе мәктәп. Ул 640 уҡыусыға һәм 160 мәктәпкәсә урынға иҫәпләнгән.
Шулай уҡ ғинуарҙа Өфөнөң Затон-Көнсығыш биҫтәһендә 1 225 урынлыҡ 163-сө белем биреү үҙәгендә уҡыу процесы башланды.
Шулай уҡ Өфөнөң “Кузнецов затоны” биҫтәһендә 2 200 уҡыусыға иҫәпләнгән Волга буйы федераль округындағы иң ҙур мәктәпте төҙөп бөтөп файҙаланыуға тапшырҙылар. Бинаның майҙаны 36 мең квадрат метрҙан ашыу һәм, уҡыу кабинеттарынан тыш, тамаша һәм спорт залдарын, бер нисә төшкө аш зонаһы менән туҡланыу блогын, асыҡ һауала спорт менән шөғөлләнеү өсөн инфраструктураны үҙ эсенә ала. Бында уҡыуҙы 2026 йылдың 16 февраленән башларға планлаштыралар.
Ағымдағы йылда 6 590 уҡыусыға һәм 160 мәктәпкәсә урынға иҫәпләнгән алты мәктәп бинаһын сафҡа индереү планлаштырыла. Шуларҙан февраль аҙағына тиклем Әбйәлил районының Асҡар ауылында 160 урынлыҡ балалар баҡсаһы менән 640 уҡыусыға иҫәпләнгән мәктәп асыласаҡ.
Ҡалған биш объектты концессия килешеүҙәре сиктәрендә төҙөйҙәр. Был Өфөлә 3 675 урынлыҡ белем биреү үҙәге, ул Глумилино, “Сағыу” биҫтәләрендә һәм Ленин районында Миловская урамында 1 225-шәр урынлыҡ өс бинанан, шулай уҡ Нефтекамала 1 225 урынлыҡ һәм Стәрлетамаҡтың “Яр буйы” биҫтәһендә 1 050 урынлыҡ мәктәптән тора.
1 сентябргә төҙөүселәр Нефтекамала, Өфөнөң “Глумилино” биҫтәһендә һәм баш ҡаланың Ленин районында объекттарҙы файҙаланыуға тапшырырға ниәтләй. Башҡа белем биреү учреждениелары буйынса эштәр йыл аҙағына тиклем тамамланасаҡ.
Илдар Мәүлетбирҙин, “Йәштәр һәм балалар” милли проектының “Балаларға иң яҡшыһы” федераль проекты сиктәрендә Өфөлә 360 уҡыусыға һәм 250 йоҡо урынына иҫәпләнгән Республика математика лицей-интернатын төҙөү дауам итә, тип өҫтәне. Ә “Ғаиләгә ярҙам” федераль проекты буйынса Өфөнөң Нуғай ауылында 260 урынлыҡ балалар баҡсаһы төҙөлә башланы.
– Беҙҙә тағы ла өс ҡатмарлы белем биреү объекты бар – Ҡариҙел һәм Асҡын райондарында, Өфөнөң Совет районында Дмитриев урамында, – тип билдәләне Радий Хәбиров. – Финанслауҙы тикшерәбеҙ һәм уларҙы төҙөп бөтөү мөмкинлеген эҙләйбеҙ.
Фото: Башҡортостан Башлығы сайты.