Уларҙың фотоһүрәттәрендә тормошобоҙ сағыла
Журналистика ветерандарына миҙал тапшырылды.
Бөгөн Өфөнөң сәнғәт галереяһында фотожурналистика тармағында хеҙмәт иткән һөнәр оҫталарының күркәм осрашыуы үтте. Ошо өлкәләге ветерандарыбыҙҙы тәбрикләү сараһына бөгөнгө көндә матбуғатта фотохәбәрсе булып эшләүсе һөнәр эйәләре лә килде.
Билдәле шәхестәр, фоторәссамдар Рәйеф Баҙыҡов һәм Вячеслав Стрижевский тураһында белмәгәндәр һирәктер. Ҡасандыр матбуғат баҫмаларында уларҙың фотоһүрәттәре донъя күргән, хәҙер 80 йәштән уҙһалар ҙа, һаман улар сафта, фотокүргәҙмәләр ойоштороп, мәҙәниәтебеҙҙе үҫтерәләр. Бөгөн уларға Рәсәй Журналистар союзының наградаһы –“ Журналистика ветераны” тигән миҙал тапшырылды.
Был мәртәбәле бурысты Башҡортостан Республикаһының Журналистар союзы рәйесе Вәдүт Исхаҡов башҡарҙы.
– Был фотоһүрәттәрҙә тормоштоң бер өлөшө, мәле сағыла, тарих күренә. Бындай күргәҙмәләр эргәһенән тыныс ҡына үтеп китеп булмай, уларҙың һәр береһе уйға һала. Рәйеф Баҙыҡов, Вячеслав Стрижеский беҙгә кәңәштәре менән дә ярҙам итә. Киләсәктә лә уларҙың һәр ваҡыт сафта булыуын теләйем, – тине ул.
Бөгөнгө сарала Мәскәүҙән дә ҡунаҡ ҡатнашты, Рәсәй Журналистар союзының матбуғат хеҙмәте фотографы Әнүәр Ғәлиевтең килеүе сараның баһаһын күтәрҙе. Коллегаларын күрергә, уларҙы наградалары менән ҡотларға илебеҙ баш ҡалаһынан ашҡынып ҡайтҡан, сөнки үҙе лә сығышы менән Өфөнән. Заманында ошо ҡалала мәктәпте тамамлаған, армия сафтарында булған, техник училищела фотограф һөнәрен алған. Һуңынан уға Мәскәүгә сығып китергә тура килә. Баш ҡалала журналистика факультетын тамамлай, төрлө урындарҙа хеҙмәт итә. Фотожурналистика бөгөн дә уның бар булмышында сағыла. Журналистика ветерандарын наградалары менән ҡотлап, уларға үҙҙәрен төшөргән фотоһүрәтте матур иҫтәлек итеп бүләк итте.
–Бөгөнгө осрашыу миҙалдар тапшырыуға ғына ҡайтып ҡалманы. Мөһим мәсьәләләр ҙә күтәрелде. Фотожурналистарҙың эштәренең архивын һаҡлау, булдырыу маҡсаты билдәләнде, – тине Әнүәр Ғәлиев.
Күптән түгел 85 йәшлек юбилейын билдәләгән Вячеслав Стрижевский “Журналистика ветераны” миҙалы менән бүләкләнеүен шатланып ҡабул итте.
Бер йәшлек сағында ул ғаиләһе менән Башҡортостанға күсеп килә һәм ғүмер буйы тиерлек ошо төбәккә хеҙмәт итә. Ошонда уҡый, хеҙмәт баҫҡыстары буйлап үрләй. Ҡыҙыҡлы кешеләр, шәхестәр менән эшләргә ярата, был уны төрлө яҡлап үҫтерә. 25 йыллап төрлө гәзит-журналда эшләй, театрға ла байтаҡ йылдар етәкселек итә.
–Мине уратҡан яҡшы кешеләр булмаһа, ошолай ҡаҙаныштарға өлгәшә алмаҫ инем. Шуға Башҡортостанға рәхмәтлемен, – ти ул.
Хәҙер ҙә, 85 йәштә, төрлө идеялар менән янып йәшәй, фотокүргәҙмәләрен уҙғара. Вячеслав Стрижевский Рәсәйҙең һәм Башҡортостандың атҡаҙанған мәҙәниәт хеҙмәткәре, Халыҡтар Дуҫлығы, Аксаков ордендары менән бүләкләнгән.
Рәйеф Баҙыҡов та - нәфис һәм документаль фотоһүрәттәр оҫтаһы, республикабыҙҙа билдәле шәхес. 1970 йылдарҙан алып ул фото эшенә тоғро. Байтаҡ йылдар республика баҫмаларында ла эшләгән. “Вечерняя Уфа”, “Советская Башкирия” гәзиттәрендә хеҙмәт иткән. Рәйеф Карам улы – Рәсәй һәм Башҡортостандың атҡаҙанған мәҙәниәт хеҙмәткәре, Ш.Хоҙайбирҙин исемендәге хөкүмәт премияһы лауреаты. Өфө сәнғәт галереяһында уның фотокүргәҙмәһе лә ойошторолғайны. Унда 55 йыл арауығында эшләгән фотоһүрәттәре урын алды.
–Объективҡа ҡаратып фотоға төшөрөү миңә хас түгел. Хәрәкәт барышында ҡыҙыҡлы мәлде эләктереп алырға тырышам, – ти фоторәссам.
Тап шуға ла уның фотоһүрәттәре тәбиғи, йәнле килеп сыға, уларҙа бер ниндәй ҙә яһалмалыҡ юҡ.
Автор фотолары.
