Был эш дауам итә
2025 йылда Башҡортостанда 221 километр терәк юл селтәре ремонтланған
2025 йылда Башҡортостанда “Тормош өсөн инфраструктура” милли проекты (национальный проект “Инфраструктура для жизни”) сиктәрендә 221 километр терәк юл селтәрен норматив хәлгә килтерҙеләр, тип хәбәр иттеләр республиканың Транспорт һәм юл хужалығы министрлығынан. Мәҫәлән, 2025 йылда Борай — Иҫке Балтас — Көйәҙе, Белорет — Учалы — Мейәс, Магнитогорск — Ира, Стәрлетамаҡ — Белорет — Магнитогорск, Кушнаренко − Саҡмағош — Баҡалы, Өфө — Инйәр — Белорет һәм башҡа юлдарҙа эштәр башҡарылды.
Төп юлдар район үҙәктәрен республиканың баш ҡалаһы Өфө менән бәйләй. Улар мөһим туристик урындарға, транспорт төйөндәренә, эре сәнәғәт объекттарына һәм кластерҙарға алып бара. Был трассалар шулай уҡ федераль юлдарға сығыуҙы тәьмин итә. Башҡортостандың транспорт һәм юл хужалығы министры Любовь Минакова, бындай транспорт артериялары юлсылар яғынан айырым иғтибар талап итә, тине.
Башҡортостандың юл селтәренең дөйөм оҙонлоғо – 4 мең километр самаһы. Шуларҙың 3188 километры — төбәк әһәмиәтендәге юлдар. Президент Владимир Путин ҡушыуы буйынса 2030 йылға терәк селтәрендәге юлдарҙың 85 проценты норматив хәлдә булырға тейеш. 2025 йылға Башҡортостанда был күрһәткес 72,5 процентҡа еткән.
2022 йылдан алып “Хәүефһеҙ сифатлы юлдар” һәм “Тормош өсөн инфраструктура” милли проекттары сиктәрендә терәк селтәренә ингән 400 километр самаһы төбәк юлдары норматив хәлгә килтерелде. 2026 йылда терәк селтәренең юлдарын, күперҙәрен һәм юл үткәргестәрен норматив хәлгә килтереү буйынса эштәр дауам итәсәк.
Фото: Башҡортостан Хөкүмәте сайты.