📢 Бөгүн Россияның Камгалал яамызының «Кызыл сылдыс» деп тоолчургу ыры болгаш танцы ансамблиниң балет бөлүүнүң солизи салым-чаяанныг самчы Роланд Кууларның дугайында төөгүп бээр бис.💪
Роланд 1995 чылда Мөңгүн-Тайга кожууннуң Мугур-Аксы суурга төрүттүнген. Тываның найысылалында Р. Д. Кенденбиль аттыг уран чүүл школазын дооскан соонда, аныяк оол Красноярскиниң хореография училищезинге өөредилгезин уламчылаан. Сөөлзүредир ол «Кызыл сылдыс» ансамблинге чогаадыкчы албан-хүлээлгезин медерелдии-биле шилип алгаш, уттундурбас 2014-2015 чылдарны эрттирген.
Шериг соонда ол Красноярск, Ставрополь Волгоград, Москва дээш хөй-ле чогаадыкчы коллективтерге ажылдап, Кыдатка безин ийи чыл иштинде чогаадыкчы хайым ишке киржип келген. Ынчалза-даа 2020 чылда салым-чол ону дедир төрээн «Кызыл сылдыс» ансамблинге эккелген.
2024 чылда «Кызыл сылдыс» ансамбли чаа программаны бараалгаткан, ында тыва танцы база кирген. Ону бистиң чаңгыс чер-чурттуувус Роланд Куулар чоргаарал-биле күүседир.
Роланд сцена чедиишкиннеринден аңгыда, өг-бүлениң аас-кежиинге өөрүп чоруур: чаптанчыг кызы Оливияны ынак өөнүң ишти Екатерина-биле кады өстүрүп турар.
Өөнүң ээзи чай чок-даа болза, Екатерина тыва культураның чараш-байлаан өөренир үени тып, дылын шиңгээдип алырын күзеп чоруур👍.
Бодун сайзыраңгайжыдарынче доктаамал чүткүлүн артист бодунуң кол сагыызыны деп адап турар: «Өөренир, өөренир база катап өөренир. Чүгле ынчаар сорулганы чедип ап болур».
«Шын» солуннуң материалдан очулдурган.