Կրոնի քաղաքականացումն ու դրա շահարկումը կարող են խորացնել հասարակական պառակտումները և վտանգի տակ դնել երկարաժամկետ անվտանգությունը, հայտարարել է ԱՄՆ-ում Հայաստանի դեսպան Նարեկ Մկրտչյանը՝ ելույթ ունենալով Save Armenia 2.0 Launch միջոցառմանը՝ Կրոնական ազատության միջազգային գագաթնաժողովի (IRF Summit 2026) շրջանակում։
Հայտարարությունը հնչել է վարչապետ Նիկոլ Փաշինյանի կողմից հայտարարված Հայ Առաքելական եկեղեցու (ՀԱԵ) «բարեփոխման» ծրագրի ֆոնին, որն ուղեկցվում է Ամենայն Հայոց կաթողիկոս Գարեգին Բ-ի հրաժարականի պահանջներով, եկեղեցու պաշտպանությամբ հանդես եկած արքեպիսկոպոսների և հասարակական գործիչների նկատմամբ քրեական գործերով, ինչպես նաև Հայաստանի զինված ուժերում հոգևոր ծառայության ինստիտուտի վերացմամբ։
Դիվանագետն ընդգծել է, որ ժամանակակից Հայաստանն աշխարհիկ պետություն է, որտեղ բոլոր քաղաքացիներն «օրենքի առաջ հավասար են»՝ անկախ իրենց կրոնական համոզմունքներից։ Նրա խոսքով՝ կրոնի և հավատքի ազատությունը հիմնարար մարդու իրավունքներից է և կարևոր դեր ունի հասարակական կայունության ու ժողովրդավարական դիմակայունության ապահովման գործում։
Դեսպանը ներկայացրել է նաև Հայաստանի կրոնապես բազմազան միջավայրը՝ նշելով, որ ՀԱԵ-ի պատմական առանձնահատուկ դերի կողքին երկրում ազատորեն գործում են եզդիական, հրեական, մահմեդական, կաթոլիկ, ավետարանական և այլ կրոնական համայնքներ, որոնց իրավունքները պաշտպանված են միասնական իրավական դաշտում։
Մկրտչյանը նշել է, որ կրոնի օգտագործումը քաղաքական նպատակներով և դրա գործիքայնացումը կարող են սրել ներքին հակասությունները և երկարաժամկետ հեռանկարում անվտանգության ռիսկեր ստեղծել երկրի համար։ Նա ափսոսանք է հայտնել, որ Կրոնական ազատության միջազգային գագաթնաժողովի հարթակն օգտագործվել է «օլիգարխների կողմից ղեկավարվող» քաղաքական շարժման կողմից՝ «Հայաստանի ժողովրդավարական ուղու վարկաբեկման և նախընտրական գործընթացների վրա ազդեցություն գործադրելու» նպատակով։
Իշխանությունների կողմից ՀԱԵ-ի դեմ իրականացվող արշավը քննադատության է արժանացել մի շարք միջազգային իրավապաշտպան և կրոնական կազմակերպությունների կողմից, որոնք տեղի ունեցողը գնահատել են որպես պետության միջամտություն եկեղեցու գործերին և կրոնական ազատության սպառնալիք։
Ավելի վաղ Կրոնական ազատության միջազգային գագաթնաժողովում ելույթ էր ունեցել «Տաշիր» ընկերությունների խմբի ղեկավար Սամվել Կարապետյանի փաստաբան Արամ Վարդևանյանը։ Կարապետյանը կալանավորվել էր ՀԱԵ-ին հրապարակային աջակցություն հայտնելուց հետո։ Վարդևանյանը մեղադրել էր Հայաստանի իշխանություններին հոգևորականների նկատմամբ հետապնդումների մեջ և հատուկ ուշադրություն էր դարձրել էթնիկ զտման ենթարկված հայ քրիստոնյա փախստականների ճակատագրին։
Նորություններին հետևեք մեր կայքում, ինչպես նաև Telegram-ում և YouTube-ում