❄️ На Гродзеншчыне рэалізуюць праект «Вяселле па беларускім канонам»
У 2026 годзе ў Гродзенскай вобласці стартуе праект «Вяселле па беларускім канонам». Яго з лютага пачынае абласны метадычны цэнтр народнай творчасці, піша «Перспектива».
Праект прысвечаны рэгіянальным асаблівасцям традыцыйнага беларускага вяселля і з’яўляецца працягам даследчай ініцыятывы «Выяўленне і адраджэнне традыцыйнай рэгіянальнай абраднасці Гродзеншчыны», распачатай у 2022 годзе.
Паводле сабраных матэрыялаў з шэрагу раёнаў вобласці, традыцыйнае вяселле Гродзеншчыны мае рысы цэнтральнай зоны беларускага Панямоння і раней доўжылася некалькі дзён. Сёння ў раёнах ужо сфарміраваны электронныя архівы па сямейнай абраднасці. Два звязаныя з вяселлем элементы нематэрыяльнай спадчыны рэгіёна ўнесены ў Дзяржаўны спіс гісторыка-культурных каштоўнасцей: традыцыі выпечкі вясельных караваяў на Ваўкавышчыне і Слонімшчыне.
У межах праекта плануецца далейшы збор матэрыялаў, у тым ліку даследаванне вясельных строяў жаніха і нявесты, праца з архівамі, музейнымі калекцыямі і ўспамінамі старэйшых жыхароў. Таксама разглядаецца магчымасць рэканструкцыі вяселля ў натуральным вясковым асяроддзі.
Асноўныя мерапрыемствы адбудуцца падчас рэгіянальнага фестывалю традыцыйнай культуры «Скарбы Гродзеншчыны» ў верасні ў Гродне. Плануецца згуляць беларускае народнае вяселле з удзелам «маладых» з усіх раёнаў вобласці.
У праграме — выставы этнапрадметаў «Арнаменты памяці ў вясельным куфары», фотавыстаўкі «Вяселле ў маёй вёсцы», а таксама выкарыстанне QR-кодаў для доступу да дадатковай інфармацыі. Праект атрымае працяг у 2027 годзе — разглядаецца выданне вясельнай энцыклапедыі або фотаальбома з рэканструяванымі элементамі абраду.
Фота: СБ
