Өфөлә ике сквер яңыртыласаҡ
Баш ҡаланың Калинин һәм Октябрь райондарында халыҡҡа ял итеү, спорт менән шөғөлләнеү өсөн уңайлы шарттар булдырыласаҡ
2026 йылда Өфөлә, ”Тормош өсөн инфраструктура” милли проектына ярашлы, йәмәғәт киңлектәрен яңыртыу дауам итәсәк. Атап әйткәндә, баш ҡаланың Калинин һәм Октябрь райондарында халыҡҡа ял итеү, спорт менән шөғөлләнеү өсөн уңайлы шарттар булдырыласаҡ. Хәтер скверы күп функциялы йәмәғәт киңлегенә әүереләсәк. Ул үҙенең мемориаль әһәмиәтен һаҡлаясаҡ, шулай уҡ ял итеү өсөн мөмкинлектәрҙе арттырасаҡ. Геройҙарҙы иҫкә алыу, хөрмәтләү менән бергә ғаилә менән күңелле ял итергә, саф һауала спорт менн шөғөлләнергә мөмкин буласаҡ. Бында балалар өсөн заманса уйын һәм спорт майҙансыҡтары барлыҡҡа киләсәк, йәйәүлеләр өсөн юл һалынасаҡ.
Рихард Зорге исемендәге сквер ҙа ғаилә менән тыныс ял итеү мөйөшөнә әүереләсәк. Төҙөкләндереү барышында данлыҡлы разведчиктың силуэты менән металдан яһалған стела урынлаштырыласаҡ. Яҡтылыҡ һәм һыу үткәреү системаларының яңыртылыуы скверҙарҙы күркәм, уңайлы итәсәк.
Исеменән үк күренеүенсә, “Тормош өсөн инфраструктура” милли проекты (нацпроект “Инфраструктура для жизни”) торлаҡ фондының кәм тигәндә 20 процентын яңыртыуҙы, тәүге баҙарҙа унан файҙаланыу мөмкинлеген арттырыуҙы, авария хәлендәге йорттарҙан халыҡты күсереүҙе һәм коммуналь селтәрҙәрҙе яңыртыуҙы бурыс итеп ҡуя. Ошо милли проектҡа ярашлы булдырылған “Коммуналь инфраструктураны яңыртыу” федераль проекты 20 миллиондан ашыу кеше өсөн 2030 йылға тиклем торлаҡ-коммуналь хужалыҡ хеҙмәттәре сифатын яҡшыртырға мөмкинлек бирәсәк. Был федераль проектҡа 4,5 триллион һум аҡса бүленәсәк. Йыл һайын коммуналь селтәрҙәрҙең 2,5 проценты яңыртыласаҡ. Уңайлы ҡала мөхитен булдырыу буйынса эш өҙлөкһөҙ дауам итәсәк: 30 меңдән ашыу йәмәғәт биләмәһен төҙөкләндереү планлаштырыла һәм бәләкәй ҡалаларҙың еңеү яулаған 1600 проекты ла был эштә ҡатнашасаҡ. Рәсәй Президенты Владимир Путин ҡарары буйынса яңы милли проект 2025 йылдың 1 ғинуарынан тормошҡа ашырыла.
Фото: Өфө ҡала хакимиәте сайты.