ЭРЕВЮЛЛЮ КЪУМУКЪЛАР
Юсуф Моллаев 1899-нчу йылда Кёстек юртда тувгъан. 1920-нчы йылларда Бахчисарайдагъы художественно-промышленный школада, сонг Москвадагъы оьр художественно-технический институтну тамамлагъан. 1930-нчу йылда ол Ленинграддагъы пролетар инчесаният институтгъа гёчюрюле ва «Теарны художниги-декораторы» деген касбу ала. Ол Дагъыстанда ачылгъан музейни 1-нчи директору, Даггосиздатны чебер редактору, сонг Дагъыстанны художниклерини союзуну председатели болуп ишлей. 1928-нчи йылдан тутуп ол Магьачкъала, Москва, Пятигорск, Грозный, Нальчик, Владикавказ ва Тбилиси шагьарларда оьтгерилген сурат выставкаларда ортакъчылыкъ этген. 1935-нчи йылда Юсуф Моллаев «Къанлыланы маслагьат этивю» деген сураты 1-нчи Темиркъазыкъ Кавказ выставкада 3-нчю премияны алгъан. Ю. Моллаев 1964-нчю йылда гечинген.
2024-нчю йылны декабр айында Тахо-Години атындагъы милли музейде Ю. Моллаевни выставкасы ачылгъан, шонда къумукъ художникни 160 асары салынгъан.
Сурат "Кумыкский исторический альбом" деген каналдан алынгъан.
