Улыма ундай “бәхет” кәрәкмәй
Сибәр ҡыҙ үҙенә ғашиҡ иттергәс кенә проблемалары тураһында һөйләгән. Баҙап ҡалдыҡ...
“Башым ҡатты, кәңәш кәрәк, ярҙам итегеҙ”, тип башланған хат килде беҙгә. Баш ҡалала йәшәгән ҡатын үҙенең аһ-зары менән уртаҡлашҡан һәм кәңәш һорай икән.
“Улыма 28 йәш. Аҡыллы, тырыш, сибәр егет. Тимур ныҡ изге күңелле, ипле, бер аҙ оялсан. Интернетта бер ҡыҙ менән танышҡан. Айгөл уға үҙе башлап яҙған һәм аралашып киткәндәр. Фотоһын күрҙем, бик сибәр ҡыҙ, һушты алырлыҡ. Яҙышыуҙары ла матур, тыйнаҡ, юмор менән. Шулай ике-өс ай самаһы аралаштылар. Улым янына барырға, осрашырға тәҡдим итһә лә, төрлө сәбәптәр табып, баш тартып килде. Ә инде улым ныҡлап ғашиҡ булғас, янына саҡырып алған. Баҡһаң, ҡыҙ сирле икән. Инвалид креслоһында ултыра, ДЦП.
Тимур уны күргәс баҙап ҡала. Улым, ысынлап, уға ғашиҡ булғайны, быны мин дә һиҙә инем. Тик сирле булыуы уны шок хәлендә ҡалдыра. Ҡыҙ иһә тәүге осрашыуҙа улыма нығыраҡ ғашиҡ була, кәйефе күтәрелә, дәртләнә. Быны күргәс, Тимур уға бер нимә лә әйтә алмай. Ҡайтҡас иһә балтаһы һыуға төшкән кеүек йөрөй.
Улым юғары белемле, һәйбәт урында эшләй. Яңы төҙөлгән йорттан фатир алды, әле унда ремонт яһай һәм айырым сығырға әҙерләнә. Бер һүҙ менән әйткәндә шәп кейәү. Мин дә бер бөртөк улымды һәйбәт ҡыҙға өйләнер, ейән-ейәнсәрҙәр табып бирерҙәр тип үҫтерҙем. Ә был ҡыҙ менән киләсәге бармы икән? Ул һау балалар табып бирә алмаҫ. Ғөмүмән, инвалид ҡатын алыу бик ҙур яуаплылыҡ та бит. Йәш кенә сағында сирле кәләш ҡарап ултыра алырмы?
Тимур аптырап минән кәңәш һорай, тик нимә тип әйтергә лә белмәйем. Үҙе әллә ғашиҡ булған, әллә йәлләй. Ҡырҡа юҡ тиер инем, ҡаршылашып, алып ҡуйыр тип ҡурҡам. Уның менән бергә бул тип тә әйтә алмайым, сирле килен кәрәкмәй. Баш ҡатҡан. Нисек ипләп кенә улымды уның менән ташлаштырырға икән?”
Һеҙ бындай хәлдә ни эшләр инегеҙ?
Фото нейроселтәр ярҙамында булдырылды.