Яугир әсәһе булыу – ҙур һынау
"Улым аҙ һүҙле, алғы һыҙыҡтағы тормошо менән уртаҡлашмай, “һеҙҙең доғаларығыҙ менән йәшәйем, барыһы ла һәйбәт”, ти. Яңыраҡ званиеһын күтәрҙеләр, ғорурланам да, борсолам да..."
Ватан һағында торған Мәсетле районы яугирҙәре өсөн республика һәм иң яҡын кешеләре – әсәйҙәр һәр саҡ ышаныслы тыл буласаҡ. Әсәләр улдарының өйҙәренә еңеү менән тиҙерәк ҡайтыуҙарын түҙемһеҙлек менән көтә. Уларҙың рух көсөнә, ныҡлығына һәм ярҙамсыллығына хайран ҡалырлыҡ. Шуларҙың береһе Зөлфиә Абдулхаҡова Мәсетле районында ғаилә психологы булып эшләй, махсус хәрби операцияла ҡатнашыусыларға һәм уларҙың ғаилә ағзаларына ярҙам итә. Ул да башҡа әсәләр кеүек Ватан һағында торған улы өсөн борсолоп та, ғорурланып та йәшәй.
Зөлфиә Данис ҡыҙының улы армия хеҙмәтен үткәндә үк үҙен хәрби хеҙмәткә арнай. 2021 йылда хеҙмәтен тамамлау менән контракт төҙөй. Әсә, әлбиттә, тәүҙә бик ныҡ ҡайғыра, әммә аҙаҡ күнә һәм терәк булырға тырыша.
“Улым менән яҙышып хәбәрләшәбеҙ, шылтыратып һөйләшергә ярамай. Шулай хәүефһеҙерәк икәнен аңлайым. Улым аҙ һүҙле, алғы һыҙыҡтағы тормошо менән уртаҡлашмай, “һеҙҙең доғаларығыҙ менән йәшәйем, барыһы ла һәйбәт”, ти. Яңыраҡ званиеһын күтәрҙеләр, хәҙер ул – прапорщик. Хәрби наградалары бар: Жуков миҙалы, I дәрәжә “Хәрби батырлыҡ өсөн”, “Отлично хеҙмәте өсөн” миҙалдары. Ул еңел булмаған юлды һайланы, әммә дөрөҫ, илһөйәрлек юлын. Бик күп таныштарыбыҙ бөгөн алғы һыҙыҡта, уларҙың еңеү менән ҡайтыуын көтәбеҙ”, – ти Зөлфиә Данис ҡыҙы.
Әсә улының бөтә ауырлыҡтарҙы еңеп сығырына тәрән ышана, “сөнки мин унда бәләкәйҙән рухлы, көслө характер тәрбиәләргә тырыштым”, ти ул. Үҙе лә бойоғоп, уйға батып ултырырға ғәҙәтләнмәгән, хужалыҡ менән шөғөлләнә, йәмәғәт эшенән айырылмай, гуманитар ярҙам тупларға булыша. Яугир әсәһе булыу – даими хеҙмәт һәм яуаплылыҡ тигән һүҙ. Был һынауҙы лайыҡлы үтергә кәрәк. Әсәләр – донъя тотҡаһы, уларҙың һәр береһенә тыныс күңел, һаулыҡ насип итһен.
Фото:”Мечетлинская жизнь”.