Бер нимәгә ҡарамай төп бурыстар үтәләсәк
Башҡортостан идара итеү командаһының ҙур сәнғәте: бер үк ваҡытта ике мәсьәләне хәл итеү – махсус хәрби операцияға һөҙөмтәле ярҙам итеү һәм республиканы үҫтереү.
Башҡортостан Башлығы Радий Хәбиров үҙенең йыллыҡ Мөрәжәғәтнамәһен командаһына бурыстар ҡуйыу һәм эштәре өсөн рәхмәт әйтеү менән тамамланы. Башҡортостан идара итеү командаһының ҙур сәнғәте: бер үк ваҡытта ике мәсьәләне хәл итеү – махсус хәрби операцияға һөҙөмтәле ярҙам итеү һәм республиканы үҫтереү.
– Тарихыбыҙ тураһында бик теүәл фекер бар. Ата-бабаларыбыҙ бер батырлыҡ түгел, ә ике батырлыҡ ҡылған. Улар Бөйөк Ватан һуғышында еңеү яулай. Аҙаҡ тулыһынса емерелгән илде күтәрәләр һәм беҙгә заводтар, фабрикалар, йорттар, театрҙар, юғары уҡыу йорттары, мәҙәниәт һарайҙары тапшыралар. Ҡарағыҙ, Өфөләге күп кенә биналар: телеүҙәк, тарихи күпер, Спорт һарайы 1950, 60-сы йылдарҙа төҙөлгән. Һуғыштан һуң нисә йыл ғына үткәс Өфөнөң сәнәғәт юлдашы – Черниковск ҡалаһы күтәрелә. Һуғыштан һуңғы йылдарҙа республикала яңы ҡалалар барлыҡҡа килә (Туймазы, Учалы, Мәләүез, Октябрьский, Нефтекама, Салауат). 300-ҙән ашыу яңы предприятие һәм производство, шул иҫәптән ҙур химия һәм нефть химияһы сафҡа индерелә. Был тәңгәлдә 2022 йылдың февралендә махсус хәрби операция башланһа ла, беҙ туҡтап ҡалманыҡ һәм социаль инфраструктураны үҫтереү мәсьәләләрен әүҙем хәл итәбеҙ, тип әйтергә теләйем. 50-нән ашыу ҙур социаль объект, шул иҫәптән 19 мәктәп, 10 балалар баҡсаһы, 11 поликлиника, 5 дауахана, 8 мәҙәниәт йорто төҙөлә. 330 фельдшер-акушерлыҡ пункты һәм ауыл амбулаторияһы индерелә, улар һаны буйынса илдә лидерҙар була.
Торлаҡ төҙөлөшө темптарының түбәнәйеүенә юл ҡуйманыҡ. 12 миллион ярым квадрат метрҙан ашыу торлаҡ сафҡа индерелде. Бейек йорттар, парк зоналары менән яңы уңайлы микрорайондар төҙөйбөҙ. 600-гә яҡын йәмәғәт биләмәһе, 500-ҙән ашыу ихата төҙөкләндерелде. 100 километрҙан ашыу юл һалынды һәм 5 мең километр самаһы юл ремонтланды. Был мөһим эште дауам итәсәкбеҙ. Быйыл тағы ла 9 социаль объект, шул иҫәптән мәктәптәр һәм поликлиникалар сафҡа индереләсәк, – тине Радий Хәбиров.
Махсус хәрби операция бындағы, тылдағы, көнүҙәк мәсьәләләрҙе хәл итмәҫ өсөн сәбәп булырға тейеш түгел, ти Радий Фәрит улы.
– 2025 йыл еңелдән булманы. Бюджет дефициты менән бәйле ауырлыҡтар булды. Әммә беҙ бөтә социаль әһәмиәтле сығымдарҙы тулыһынса тәьмин итәбеҙ. Элек ҡабул ителгән пландарға һәм программаларға ярашлы башҡа мөһим йүнәлештәрҙе хуплайбыҙ.
Был йәһәттән беҙҙең өсөн иң мөһиме – кешеләрҙең лайыҡлы йәшәү сифатын һәм кимәлен, иҡтисадтың бөтә секторҙарының һөҙөмтәле эшен тәьмин итеү, мөһим инфраструктура объекттарын төҙөүҙе дауам итеү. Беҙ элеккесә сәнәғәт производствоһында, инвестициялар, эшҡыуарҙар әүҙемлеге буйынса алдынғылар рәтендә. Бөгөн иҡтисади фронт Еңеү өсөн мөһим. Президентыбыҙ ҡуйған илдең милли үҫеш маҡсаттарына өлгәшеү өсөн, – тине ул.
Башҡортостан Башлығы республика Хөкүмәтенә, Премьер-министр Андрей Назаровҡа төбәктең иҡтисадын һәм социаль өлкәһен үҫтереү буйынса системалы эш алып барыуы өсөн рәхмәт белдерҙе.
– Шулай уҡ муниципалитет башлыҡтарына рәхмәт һүҙҙәрен әйтергә теләйем. Һеҙ ауыр шарттарҙа эшләйһегеҙ, вазифағыҙҙан тыш күп кенә мәсьәләләрҙе хәл итәһегеҙ. МХО-ла ҡатнашыусыларҙы һәм уларҙың ғаиләләрен хәстәрләйһегеҙ. Һәләк булған геройҙарҙың туғандары һәм яҡындарының ҡайғыһын уртаҡлашаһығыҙ, ауыр мәлдә уларға ярҙам итәһегеҙ. Бындай минуттарҙа һеҙ бөтә республика, бөтә ил исеменән вәкил булараҡ сығыш яһайһығыҙ. Был кешелек йәһәтенән бик еңел түгел. Яугирҙәребеҙҙең туғандары һәм яҡындары һеҙҙе танып тороуы, ярҙамығыҙ өсөн ихлас рәхмәт әйтеүҙәре миңә ныҡ тәьҫир итә һәм шатландыра. Был бигерәк тә алғы һыҙыҡта яңғырағанда мөһим. Хөрмәтле коллегалар, һеҙгә рәхмәт, – тине Радий Хәбиров.
Шулай уҡ республика Башлығы депутаттар корпусына, Дәүләт Йыйылышы – Ҡоролтайҙағы сәйәси партиялар фракциялары лидерҙарына, депутаттар корпусына сәйәси өлгөргәнлеге, республика алдында торған бурыстарҙы хәл итеүҙә ярҙамы өсөн рәхмәт белдерҙе.
–Ниндәй партияла тороуығыҙға, мөһим проблемаларҙы хәл итеүгә ҡараштарҙың төрлө булыуына ҡарамаҫтан, һеҙ бик ҡатмарлы мәсьәләләр буйынса консенсус табаһығыҙ. Хөрмәтле депутаттарыбыҙға ҙур эше, махсус хәрби операция бурыстарын хәл итеүгә ҙур өлөш индергәндәре, яугирҙәргә һәм уларҙың ғаиләләренә ярҙам иткәндәре, йәштәргә патриотик тәрбиә биргәндәре өсөн ихлас рәхмәт. Күп кенә төрлө кимәлдәге депутаттар – ауыл советынан алып республика парламентына тиклем – үҙ теләге менән хәрби хеҙмәткә китте һәм алғы һыҙыҡта хәрби бурыстарҙы лайыҡлы үтәй, - тип билдәләне Радий Хәбиров.
Башҡортостан Башлығы сайты.