“Барыһы ла еңеү өсөн!” - лозунг түгел, ә тормош ҡарашы
Спикер фекеренсә, илгә һәм республикаға тыштан киң мәғлүмәт-психологик һөжүм барған шарттарҙа тап берҙәмлек беҙҙең өсөн төп ҡоралға әйләнә.
Башҡортостан Башлығы Радий Хәбировтың Дәүләт Йыйылышы – Ҡоролтай депутаттарына йыллыҡ Мөрәжәғәтнамәһе башҡарылған эш тураһында отчет ҡына түгел, ә Рәсәйгә ҡаршы гибрид һуғыш шарттарында стратегик белдереү булды. “Бөтәһе лә еңеү өсөн” тигән тәүге һүҙҙәр бөтә сығышҡа йүнәлеш билдәләне. Был фраза һәр темаға үтеп инде: иҡтисадтан алып мәҙәниәткә, мәғарифтан алып социаль сәйәсәткә тиклем. Ошондай фекерҙе сәйәсәт фәндәре кандидаты, Мәҙәниәт министрлығы ҡарамағындағы Гуманитар тикшереүҙәр үҙәге директоры Марат Мәрҙәнов белдерҙе.
– Республика Башлығы асыҡ итеп билдәләне: Башҡортостан – Рәсәйҙең ышаныслы таянысы, һәм ул быуаттар буйына раҫланған ысынбарлыҡ. 1812 йылғы Ватан һуғышы йылдарында, башҡорт атлы полктары Наполеон армияһын ҡыйрата, Бөйөк Ватан һуғышында, республика Мәскәүҙән Берлинға тиклем үткән тиҫтәләгән хәрби берләшмәләр төҙөй. Бөгөн дә, махсус хәрби операция шарттарында, Дәүләт Йыйылышы – Ҡоролтай ултырыштары залында Башҡортостандан ойошторолған 19 хәрби берләшмәнең байрағы торҙо, – тине ул.
Спикер фекеренсә, илгә һәм республикаға тыштан киң мәғлүмәт-психологик һөжүм барған шарттарҙа тап берҙәмлек беҙҙең өсөн төп ҡоралға әйләнә.
– Рәсәй ФАДН мәғлүмәттәре буйынса, МХО башланғандан алып республика киң масштаблы тышҡы мәғлүмәт йоғонтоһо үҙәгендә була, сит илдәрҙән башҡарылған мәғлүмәт һөжүмдәре һаны буйынса Рәсәй субъекттары араһында алдынғы позицияларҙы биләй. 2024 йыл менән сағыштырғанда Башҡортостанға мәғлүмәт һөжүмдәре һаны 48 процентҡа артҡан – йылына 1300-ҙән 2000-гә яҡын мәғлүмәткә тиклем!
Әгәр элек дошман миграция, тел йәки экологик көн тәртибен һелкетеп, шаблонлы эш итһә, хәҙер уның һөжүме тарихи хәтерҙе ялғанлаштырыуға, Башҡортостан халыҡтарының Бөйөк Ватан һуғышында еңеүгә индергән өлөшөн кәметеүгә, милләт-ара мөнәсәбәттәр өлкәһе аша йәмғиәтте һелкетеүгә йүнәлтелгән. Тап шуға күрә Башҡортостан күп милләтлелек көсһөҙлөк түгел, ә дәүләтселектең нигеҙе булып хеҙмәт иткән төп төбәктәрҙең береһе булараҡ тышҡы мәғлүмәт йоғонтоһо үҙәгендә булды.
Әммә дошман яңылыша. Республика Башлығы билдәләүенсә, халҡыбыҙ һуғыш һәм ауыр йылдарҙы үтте, һәм тап ошо уның берҙәмлек тойғоһон нығытты. Республика халҡы ла, гибрид һуғыш башланғандан алып, бындай провокацияларға бирешмәй, ҙур патриотик кәйеф күрһәтә. Шуға бәйле, сит илдәрҙән килгән оппоненттарыбыҙ асыҡтан-асыҡ ялған мәғлүмәт урынлаштырыуға, хатта бөтөнләй уйлап сығарылған конфликтлы хәлдәргә баҫым яһай башланы.
Был хәүеф иҫкәртеү һәм оператив яуап биреү буйынса өҫтәмә саралар талап итә. Бындай мәғлүмәт ялғандарына ҡаршы тороу маҡсатында республикала төбәк медиамайҙанында деструктив көстәр ташлаған фейктарҙы оператив асыҡларға һәм аңлатырға мөмкинлек биргән система төҙөлә.
Был сараларҙың һөҙөмтәлелеге социологик тикшеренеүҙәр менән дә раҫлана. Гуманитар тикшеренеүҙәр үҙәге һорау алыу һөҙөмтәләренә ярашлы, 2025 йылда милләт-ара мөнәсәбәттәрҙең торошон респонденттарҙың 92,5 проценты яҡшы тип баһалай, һәм был күрһәткес һуңғы йылдарҙа тотороҡло үҫә. Шулай уҡ 2021 йылдан Башҡортостанда халыҡтың дөйөм Рәсәй гражданлыҡ берәгәйлегенең тотороҡло үҫеше күҙәтелә – 73,1 проценттан 82,5 процентҡа тиклем. Республикала йәшәүсе һәр кеше, этник сығышына ҡарамаҫтан, Рәсәй яҙмышын уртаҡлаша.
Ошо шарттарҙа “Барыһы ла еңеү өсөн!” лозунг түгел, ә тормош ҡарашы. Һәм ул туранан-тура йәмәғәт дискурсында йышыраҡ яңғыраған икенсе тезис менән ауаздаш – Рәсәйҙең һәр ваҡыт ике союздашы ғына бар – Армия һәм Флот.
Иллюзиялар юҡ. "Ундағы әллә кемгә" өмөт тотмайбыҙ. Тик берҙәмлек, яуаплылыҡ һәм Ватанды бергә яҡларға әҙерлек. Тап ошонда – Башҡортостандың төп көсө. Һәм тап шуға күрә ул тыныс ваҡытта һәм һынау йылдарында Рәсәйҙең ышаныслы таянысы булып ҡала, - тине ул.
Фото: геройҙың шәхси архивынан.