Изге эштән журналистар ҙа ситтә ҡалмай
Башҡортостан Журналистар союзы рәйесе, “Башҡортостан” республика гәзитенең баш мөхәррире Вәдүт Ғәйфулла улы ИСХАҠОВ республика Башлығының йыллыҡ Мөрәжәғәтнамәһе тураһында фекерҙәре менән уртаҡлашты.
Башҡортостан Журналистар союзы рәйесе, “Башҡортостан” республика гәзитенең баш мөхәррире Вәдүт Ғәйфулла улы ИСХАҠОВ республика Башлығының йыллыҡ Мөрәжәғәтнамәһе тураһында фекерҙәре менән уртаҡлашты.
– Башҡортостан Башлығы Радий Хәбиров Дәүләт Йыйылышы – Ҡоролтайға йыллыҡ Мөрәжәғәтнамә менән сығыш яһаны. Төбәк етәксеһенең быйылғы сығышының төп асылын махсус хәрби операция яугирҙәренә, уларҙың ғаиләләренә, балаларына ярҙам итеү, Еңеү хаҡына берләшеү, бөтә йүнәлештәге эшмәкәрлегебеҙҙе ошо изге маҡсатҡа йүнәлтеүгә бәйле саҡырыуҙар тәшкил итте.
“Быйылғы йылға төп бурысты өс һүҙ менән билдәләй алам – БАРЫҺЫ ЛА ЕҢЕҮ ӨСӨН!”, – тине Радий Фәрит улы.
Был һүҙҙәрҙең ни тиклем ҙур мәғәнәгә эйә булыуын, илебеҙҙең, күп милләтле Рәсәй халҡының киләсәге һәм үҫеше тап ошо ЕҢЕҮгә бәйле булыуын бөтәбеҙ ҙә бар күңелебеҙ, йөрәгебеҙ менән аңлайбыҙ, уның тиҙерәк етеүен теләйбеҙ һәм берҙәм рәүештә үҙ өлөшөбөҙҙө индерергә тырышабыҙ.
Был изге эштән Башҡортостан журналистары ла ситтә ҡалмай. Улар әллә нисәмә тапҡыр гуманитар ылауҙар туплап оҙатты, коллективтарҙа маскировка селтәрҙәре үреү, яугирҙәребеҙгә сәк-сәк, туҡмас кеүек күстәнәстәр әҙерләү эшен ойошторҙо. Аҡсалата ярҙам йыйып, МХО шарттарында ныҡ кәрәкле ҡорамалдар, айырыуса дрондар, генераторҙар, башҡа төрлө кәрәк-яраҡ һатып алдыҡ, уларҙы үҙ ҡулдарыбыҙ менән яугирҙәргә алып барып тапшырҙыҡ.
Ҡыйыу йөрәкле, үҙ һөнәренең оҫтаһы булып танылған бихисап ҡәләмдәштәрем МХО биләмәһенә командировкаларға даими барып тора. Улар, ғүмерҙәрен ҡурҡыныс аҫтына ҡуйып, унда барған ваҡиғаларҙы үҙ күҙҙәре менән күреү, дөрөҫлөктө яҡтыртыу, ошо әһәмиәтле осорҙо тарихта ҡалдырыуҙы маҡсат итеп ҡуя.
Быны үҙ сығышында Радий Хәбиров та асыҡ билдәләне: “Тормош шулай ҡоролған: барыһы ла бик тиҙ онотола. Күп тә үтмәҫ, был һуғыш тураһында күп нәмәләр һаҡланып ҡалмауы ихтимал. Быларҙың барыһын да архивтарҙа, китаптарҙа, фильмдарҙа, ә иң мөһиме, йөрәктәребеҙҙә мотлаҡ һаҡларға кәрәк. Беҙҙең өсөн дә, киләһе быуындар өсөн дә. Ошондай әйберҙәрҙе онотһаҡ, милләт булыуҙан туҡтайбыҙ”, – тине ул.
Ошо изге маҡсатҡа хеҙмәт иткән журналистарҙың хеҙмәтен баһалап, бөтә ил буйынса иң тәүгеләрҙән булып “Хәрби хәбәрсе” исемен булдырғаны өсөн республикабыҙ Башлығына ҙур рәхмәтлебеҙ!
Барыбыҙға ла мәғлүм: төбәк етәксеһенең Мөрәжәғәтнамәһе тотош йылға аныҡ бурыстарҙы билдәләй. Быйылғы сығыш илебеҙ, республикабыҙ етәкселеге алып барған сәйәсәттең ныҡлығын, бары тик еңеүгә төбәлгән булыуын тағы бер тапҡыр раҫланы. Ул ошо еңеү хаҡына бығаса булмағанса берҙәмлек күрһәткән халҡыбыҙҙы тағы ла ҙурыраҡ эштәргә дәртләндерер, бергә туплар, тип ышанам.
Мөрәжәғәтнамәне тыңлағанда ғәҙел донъя тәртибе өсөн көрәш барған бөйөк Рәсәйҙең бер өлөшө булыуыбыҙ, ошо изге эшкә ҙур өлөш индереүебеҙ өсөн ысын мәғәнәһендә ғорурлыҡ тойғоһо кисерҙем, – тине Вәдүт Ғәйфулла улы.