Геройҙар онотолмаясаҡ!
Был эштә журналистар, яҙыусылар, ижади интеллигенция ла ярҙам итергә тейеш.
Бөгөн республика парламентына Мөрәжәғәтнамәһен уҡып ишеттергәндә Башҡортостан Башлығы Радий Хәбиров махсус хәрби операция яугирҙәренә әхлаҡи ярҙам күрһәтеүҙең мөһимлеген һыҙыҡ өҫтөнә алды һәм дөрөҫ булмаған мәғлүмәт таратыуға һәм хәҡиҡәтте боҙоп күрһәтеүгә ҡаршы торорға саҡырҙы.
"Беҙ йөҙләгән патриотик йүнәлештәге саралар үткәрәбеҙ. Августа Рәсәй Оборона министрлығы менән берлектә Армия мәҙәниәте көндәрен үткәрҙек, бөтә республиканы концерт программалары солғап алды. Беҙгә фронт бригадаларынан беҙҙең егеттәр килә һәм сығыш яһай алды. Меңәрләгән тамашасыны “Геройҙар ваҡыты” Бөтә Рәсәй конкурсы йыйҙы. Беҙ яҡташтарыбыҙҙың батырлыҡтары тураһында тиҫтәләгән китап баҫтырып сығарҙыҡ, – тине Радий Фәрит улы. – Мәҙәниәт эшмәкәрҙәребеҙгә – яҙыусыларға, шағирҙарға, рәссамдарға, композиторҙарға, режиссерҙарға, артистарға мөрәжәғәт итәм. Хәҙер һеҙҙең ижади энергияғыҙ дөйөм әхлаҡи рухты нығытыу, яугирҙәребеҙгә ярҙам итеү өсөн эшләргә тейеш. Уларға тылда ярҙам итеүселәр еңеү өсөн барыһын да эшләй.
Шулай уҡ Башлыҡ журналистарыбыҙға, бигерәк тә хәрби хәбәрселәргә рәхмәт белдерҙе. “Улар әҙерләгән йөҙләгән сюжет, репортаж, ысынбарлыҡтағы хикәйәләр беҙҙең киң мәғлүмәт сараларында, социаль селтәрҙәрҙә һәм мессенджерҙарҙа тере яуап ала. Беҙ журналистар өсөн махсус премия булдырҙыҡ. Илдә беренсе булып хәрби хәбәрселәр тураһында закон ҡабул иттек, уларҙың статусы, ярҙам саралары тәртибе билдәләнде. Артабан да ышаныслы мәғлүмәтте ялғанға, төрлө фейктарға ҡаршы ҡорал итеп ҡулланырға кәрәк”, – тигән бурыс ҡуйҙы Башҡортостан Башлығы.
Артабан Радий Хәбиров герой яҡташтарыбыҙ тураһында ентекле һөйләне. 15 Башҡортостан кешеһе Рәсәй Геройы исемен алды, ҡыҙғанысҡа ҡаршы, туғыҙы – һәләк булғандан һуң. Ошо көндәрҙә генә гвардия капитаны Владислав Бочаровтың ата-әсәһенә Рәсәй Геройы Йондоҙо тапшырылды.
– Бөгөн бында залда һәләк булған геройҙарыбыҙҙың әсәләре ҡатнаша. Ошондай улдар тәрбиәләгәнегеҙ өсөн һеҙҙең алда баш эйәбеҙ, ҡәҙерле әсәйҙәр. Беҙҙән, бөтә республиканан. Һеҙгә ныҡлы һаулыҡ! Беҙ һәр ваҡыт һеҙҙең менән бергә буласаҡбыҙ. Беҙ Генерал Шайморатов орденын һәм миҙалын булдырҙыҡ. Меңәрләгән яугир был наградаларға лайыҡ булды. Улар һәр ваҡыт батырлыҡ һәм ҡаһарманлыҡ символы булып торасаҡ. Йылдар үткәс, ветерандарҙы һәм наградаларҙы уларҙың күкрәгендә күргәс, баш эйәбеҙ һәм уларға "Рәхмәт" тип әйтәбеҙ, – тине Радий Хәбиров. – Батырлыҡ күрһәткән яҡташтарыбыҙҙың хеҙмәте лайыҡлы баһаланһын өсөн Хәрби комиссариаттан, МХО ветерандары ассоциацияһынан хәрби частар командирҙары менән берлектә барыһын да эшләүҙе үтенәм. Шулай уҡ яугирҙәребеҙҙең батырлыҡтары хаҡында хәтерҙе һаҡлау, һәләк булғандарҙың исемдәрен мәңгеләштереү бик мөһим, – тине Радий Хәбиров һәм барыһынан да геройҙарыбыҙҙы бер минут тынлыҡ менән иҫкә алыуҙарын һораны.
Башҡортостан Башлығы Радий Хәбиров республиканың “Ватанды һаҡлаусылар” дәүләт фонды филиалы менән тығыҙ эшләүен билдәләне. Бөгөн унда 120 социаль координатор эшләй, 15 меңдән ашыу кеше оҙатыла. Филиал ойошторолғандан алып 130 меңгә яҡын мөрәжәғәт эшкәртелгән.
– Был һандар артында — бик ҡатмарлы һорауҙар. Артыҡ арттырыуһыҙ, был - беҙҙең яҡлаусыларыбыҙҙың һәм уларҙың яҡындарының яҙмышы. Беҙ филиалыбыҙға Өфөләге Совет майҙанында махсус йыһазландырылған яңы бина тапшырҙыҡ. Фонд рәйесе, статс-секретарь – оборона министры урынбаҫары Анна Цивилеваға республикабыҙға ярҙам иткәне өсөн рәхмәтлебеҙ, – тине ул.
Шулай уҡ республика етәксеһе МХО-ла ҡатнашыусылар ассоциацияһының ролен айырым билдәләне.
– Һеҙ ветерандар менән бер телдә һөйләшәһегеҙ. Уларҙың хистәрен һәм кисерештәрен ярты һүҙҙән аңлайһығыҙ. Ҡайһы бер урындарҙа аңлашылмаусанлыҡтарҙы бөтөрөргә ярҙам итәһегеҙ. Район һәм ҡалаларҙа урындағы бүлексәләр бар. Ассоциация етәксеһе, республика Башлығы ярҙамсыһы Оскар Ситдиҡовҡа барлыҡ муниципалитеттарҙа ла эште әүҙемләштерергә ҡушам. Йыл аҙағына һеҙ көслө йәмәғәт ойошмаһына әйләнергә тейешһегеҙ. Хөкүмәттән бының өсөн финанслау сығанаҡтарын билдәләүен һорайым. Мин был залда хәрби хәрәкәттәр ветерандарының йәмәғәт ойошмалары вәкилдәрен күрәм. Ойоштороу осоронда беҙгә баһалап бөткөһөҙ ярҙам күрһәткәнегеҙ өсөн рәхмәт, — тине Радий Хәбиров.
Фото: "Башинформ".