Հնդկաստանում մահացու Նիպա վիրուսի հաստատման երկու դեպքից հետո Թաիլանդի, Սինգապուրի, Հոնկոնգի և Մալայզիայի իշխանություններին ստիպել են խստացնել օդանավակայաններում ստուգումները՝ վարակի տարածումը կանխելու համար, տեղեկացնում էReuters-ը:
Հնդկաստանում վարակի դեպքերը հաստատվել էին 2025 թվականի դեկտեմբերի վերջին: Բենգալիա նահանգում վարակված անձինք առողջապահական ոլորտի ներկայացուցիչներ են, երկուսն էլ բուժվում են տեղի հիվանդանոցում, Reuters-ին հայտնել է շրջանի առողջապահության պատասխանատուն:
Հնդկաստանի առողջապահության նախարարությունից փոխանցել են, որ իշխանությունները նույնականացրել և հայտնաբերել են այս երկու դեպքի հետ կապված 196 կոնտակտավոր անձի, նրանցից որևէ մեկի մոտ այս պահին ախտանշաններ չկան:
BBC-ն գրում է, որ հարավարևելյան Ասիայի հարևան երկրները, նաև Նեպալը և Հոնկոնգն սկսել են հատուկ քայլեր ձեռնարկել՝ իրենց տարածքում վարակի հնարավոր տարածումը կանխելու համար։ Սինգապուրում, Թաիլանդում, Մալայզիայում հայտարարել են, որ Հնդկաստանից ժամանող ուղևորների համար օդանավակայանում ջերմաչափում կկազմակերպվի։ Հոնկոնգի օդանավակայանում ևս կանխարգելիչ քայլեր են ձեռնարկվել:
Չինաստանը և Նեպալը հայտարարել են առողջապահական միջոցները վարակված տարածքներից երկիր ժամանողների համար խստացնելու մասին։
Ըստ Առողջապահության համաշխարհային կազմակերպության՝ Նիպան համարվում է աշխարհում ամենավտանգավոր վիրուսներից մեկը: Աշխարհում, 2025-ի տարեվերջի տվյալներով, գրանցվել էր Նիպայի 750 հաստատված վարակ, 415-ը՝ մահվան ելքով։
Չնայած արձանագրված փոքր բռնկումներին՝ վարակաբանների գնահատմամբ՝ ընդհանուր բնակչության համար ռիսկը ցածր է։ Մի շարք պատվաստանյութեր ներկայում գտնվում են մշակման և փորձարկման փուլերում։
Վիրուսը կարող է առաջացնել ջերմություն և ուղեղի բորբոքում, իսկ մահացության մակարդակը 40-75% է: Չնայած այն կարող է փոխանցվել մարդուց մարդ, փոխանցման գործընթացը հեշտ չէ և, սովորաբար, պահանջում է երկարատև շփում վարակված անձի հետ: Ամենից հաճախ վիրուսը մարդկանց փոխանցվում է վարակված չղջիկների կամ դրանցով վարակված մրգերի միջոցով:
Նորություններին հետևեք մեր կայքում, ինչպես նաև Telegram-ում և YouTube-ում