«Кинилэр Кыайыыны уһансыбыттара» кинигэ таҕыста
Маннык ааттаах дьоһун кинигэни Тиит Арыы нэһилиэгэ таһааран бу нэдиэлэҕэ бар-дьонугар билиһиннэрэр.
Үйэлээх өйдөбүнньүгү нэһилиэк энтузиаст дьоно Галина Белых, Раиса Степанова иилээн-саҕалаан аҕа көлүөнэ олорон ааспыт олоҕун, бастакы уонна иккис аан дойду сэриилэригэр, Ийэ дойду көмүскэлигэр кыттыыларын кэриэстээн обществениктар көмөлөрүнэн бэлэмнээн таһаардылар.
Кинигэ тахсыытыгар үлэлэспит дьон өр сылларга бэтэрээннэр сэбиэттэрин салайбыт ытык киһи, буойун Иван Петрович Ефремов сыралаһан туран түмпүт матырыйаалларыгар тирэнэн, ону сэргэ баһылыктаан олорбут Степан Дмитриевич Соловьев өйөбүлүнэн Кыайыы 65 сылыгар күн сирин көрбүт кинигэлэрин өссө кэҥэтэн, эбии ахтыылары киллэрэн биир дойдулаахтарыгар утары ууннулар. Бу таһаарыы 116 Кыайыы туһугар олохторун кэрэйбэтэх сэрии толоонугар охтубут, сураҕа суох сүппүт буойуттарга өлбөт сүппэт өйдөбүнньүк, махтал бэлиэтэ буолла.
Людмила Аммосова.
