🎨 160 год з дня нараджэння Льва Бакста — ураджэнца 🦌 Гродна, выбітнага мастака, сцэнографа і аднаго з галоўных творцаў еўрапейскай тэатральнай эстэтыкі пачатку ХХ стагоддзя
Нарадзіўся 27 студзеня 1866 года ў горадзе над Нёманам ў сям’і дробнага гандляра. У дзяцінстве разам з сям’ёй пераехаў у Пецярбург, дзе вучыўся ў 6-й гімназіі і ў Пецярбургскай Акадэміі мастацтваў. Пазней удасканальваў адукацыю ў Парыжы — у студыях Жана-Леона Жэрома і Рудольфа Жульена, а таксама ў фінскага мастака Альберта Эдэльфельта.
У 1890—1900 гадах Бакст працаваў у Маскоўскім мастацкім і Аляксандраўскім тэатрах, ствараў партрэты, кніжныя ілюстрацыі і графічныя працы. Быў адным з актыўных удзельнікаў аб’яднання «Свет мастацтва», супрацоўнічаў з аднайменным часопісам, а таксама з выданнямі «Залатое руно» і «Апалон». Яго першай буйной тэатральнай працай стаў балет «Сэрца маркізы» ў пастаноўцы Марыюса Петыпа.
У 1902 годзе Бакст выконваў заказ імператара Мікалая II — карціну «Сустрэча рускіх маракоў у Парыжы». У 1906—1909 гадах выкладаў жывапіс у прыватнай мастацкай школе ў Пецярбургу; сярод яго вучняў быў Марк Шагал.
З 1909 года мастак жыў пераважна ў Парыжы. Ён стаў вядучым дэкаратарам «рускіх сезонаў за мяжой» Сяргея Дзягілева, ствараючы дэкарацыі і касцюмы для балетаў «Клеапатра», «Шэхерэзада», «Жар-птушка», «Нарцыз», «Дафніс і Хлоя». У 1910—1920-я гады працаваў у тэатрах Лондана, Нью-Ёрка, Бруселя і Рыма.
Як жывапісец Бакст выстаўляўся ў Берліне, Празе, Вене, Венецыі, Рыме, Парыжы і Мюнхене. Пісаў пейзажы, партрэты, дэкаратыўныя пано, сюжэтна-тэматычныя кампазіцыі. Быў аўтарам тэарэтычных прац па мастацтве, у 1914 годзе абраны членам Імператарскай акадэміі мастацтваў і ўдастоены ордэна Пачэснага легіёна.
Леў Бакст памёр 27 снежня 1924 года ў Парыжы ад ацёку лёгкіх. Яго імем названа адна з вуліц французскай сталіцы. Некаторыя творы мастака захоўваюцца ў карпаратыўнай калекцыі Белгазпрамбанка ў Мінску.
Чытайце таксама:
📖Mark Formelle выпусціў новую калекцыю – у стылі сусветна вядомага мастака з Гродна
📖У Гродне з’явіцца музей Льва Бакста? Такую прапанову агучылі ў сінагозе
