То тирик экансан

То тирик экансан...

То тирик экансан: кураш, ишла, ён!

То тирик экансан: сев, севил, қувон!

То тирик экансан: изла, қидир, топ!

То тирик экансан: интил, юксал, чоп!

То тирик экансан одамдай йиғлаб,

Одамдай севиниб, қайғуриб яша!

Севдингми, ёрингни дадил қўлтиқлаб,

Одамли кўчадан одиминг ташла!

Дард-алам ўтганда ошкор ёш тўкиб,

Қувонсанг ошкора хандон отиб кул!

Душманинг қаддини бешафқат букиб,

Дўстингга тута бил даста-даста гул!

Дўстларинг қўл сиқиб, нурга чўмганда

Қалб тафтинг кафтида ловуллаб қолсин.

Вақт етиб кўзингни мангу юмганда

Сен юрган кўчалар ҳувиллаб қолсин!

✍️Эркин Воҳидов,

Ўзбекистон халқ шоири.

Каналимизга обуна бўлинг ва энг сўнгги янгиликларни кузатиб боринг

Jizzaxnews |Тelegram  | Facebook | Dzen | YouTubе