Яңауылды төҙөкләндереү проекты ҡаралды
Ҡала федераль проектта ҡатнашырға ниәтләй.
24 ғинуарҙа Яңауыл районына эш сәфәре мәлендә Башҡортостан Башлығы Радий Хәбиров Яңауылды артабанғы төҙөкләндереү проекттары менән танышты. 2026 йылда муниципалитет уңайлы ҡала мөхитен формалаштырыу буйынса федераль проектта ҡатнашырға ниәтләй.
Хәтерегеҙгә төшөрәбеҙ, Яңауыл ике тапҡыр бәләкәй ҡала һәм тарихи биләмәләрҙә уңайлы ҡала мөхитен булдырыу Бөтә Рәсәй конкурсында еңде. 2020 йылда “Башҡортостандың төньяҡ ҡапҡалары” проекты, 2022 йылда “Бәләкәй ҡала мәҙәниәте. Яңауыл үҙәген әүҙемләштереү” проекты менән уңышҡа өлгәштеләр. Башҡарылған эш һөҙөмтәһендә яңы йәмәғәт биләмәһе тарих һәм тыуған яҡты өйрәнеү музейы, Октябрьский, Ленин, Азин урамдары биләмәләрен, Үҙәк майҙанды, ҡала паркын берҙәм мәҙәни кластерға берләштерҙе. Ҡаланың көньяҡ өлөшөндә төҙөкләндереүҙең дөйөм майҙаны биш гектарҙан артып китә. 2025 йылда яңыртылған урам музей экспозицияһы “Алтын Трезини” халыҡ-ара премияһының алтын дипломына лайыҡ булды. Ә ҡала үҙәген төҙөкләндереү проекты Бөтә Рәсәй “Рәсәй парктары” премияһының топ-5 иҫәбенә инде.
Яңауыл районының баш архитекторы Ирина Тажетдинова төбәк етәксеһенә “Яңауылдың икенсе яғы” тигән төньяҡ өлөшөн төҙөкләндереү буйынса яңы проект күрһәтте.
- Ҡала халҡының йәшәү сифатын күтәреү, туристарҙы йәлеп итеү йүнәлешендә әүҙем эш алып барабыҙ, - тине Ирина Тажетдинова. – Планда – ҡаланың төньяҡ өлөшөндә йәмәғәт киңлектәрен артабан үҫтереү, яңы ял зоналары булдырыу. Ҡаланың уникаль йөҙөн булдырыу өсөн мәҙәни һәм тарихи объекттарҙы интеграциялау. Яңы концепция ҡаланың көньяҡ һәм төньяҡ ҡулсаһын берләштерергә булышлыҡ итәсәк.
Төбәк етәксеһе урындағы быуаның һәм уның эргә-тирәһен төҙөкләндереү мөһимлеген дә иғтибарға алды.
- Яңауыл беҙҙең тәүге ҡарлуғас булды. Һеҙ тәүгеләрҙән булып федераль конкурста ҡатнаштығыҙ һәм башҡа муниципалитеттарға юл күрһәттегеҙ, - тине Радий Хәбиров. – Проектығыҙҙы хуплайым. Былтыр беҙҙә биш муниципалитет еңгәйне, һеҙҙең дә быға бөтә мөмкинлектәрегеҙ бар.
Фото: Азат Мөхәмәтйәнов. Башҡортостан Башлығының матбуғат хеҙмәте.