У Дзень сэлфі Смаргонскі гісторыка-краязнаўчы музей, які ўключае ў сябе сектар гісторыі Крэўскага замка, падводзіць вынікі 2025 года. Летась музей наведала 21,5 тысячы чалавек, і кожны знайшоў свой улюбёны ракурс, каб застацца на фатаграфіі разам з гісторыяй.
Хто сэлфіўся ў музеі?
Прыкладна трэць наведвальнікаў – дзіцячая аўдыторыя. Гэта школьнікі не толькі Смаргоншчыны, а і Астравеччыны, і Ашмяншчыны, а таксама выхаванцы ДРАЦ «Лясная паляна». Частыя госці – юная публіка з Мінскай вобласці. Што тычыцца дарослых наведвальнікаў, то тут геаграфія наогул шырокая: прадстаўнікі ўсіх абласцей рэспублікі пабывалі на Смаргоншчыне, а таксама госці з Расіі, Кітая, Лівіі, Паўднёвай Карэі, В’етнама, Латвіі, Іспаніі, Італіі, Германіі. Усе яны зрабілі сабе на памяць фотаздымкі з музея.
ТОП-5 любімых ракурсаў у музеі
1. Каля пудзіла Мядзведзя і манекена Скамароха – вучань «Смаргонскай акадэміі» і яго павадыр. Знаходзяцца яны ў зале «Шляхамі кірмашовымі», прысвечанай мінуламу Смаргоні XVI – XIX стагоддзяў.
2. Каля прылаўка з абаранкамі. У XVІІІ стагоддзі, асабліва ў XIX і ў пачатку ХХ Смаргонь славілася абаранкамі, якія выпякалі смаргонскія жанчыны.
3. У зале «Крэва ў XIV – XVII стагоддзях» – каля макета Крэўскага замка.
4. Ля карты Смаргонскага раёна пры ўваходзе ў экспазіцыйную залу.
5. На фоне карцін смаргонскіх мастакоў Ліліі Трохалевай і Аляксандра Іванова, якія знаходзяцца ў зале, дзе прадстаўлена інфармацыя пра таленавітых людзей Смаргоншчыны.
Экспанаты для сэлфі
Смаргонскі музей – скарбніца артэфактаў мінулага, яна захоўвае 11650 прадметаў асноўнага фонду. Гэта калекцыі жывапісу, графікі, дэкаратыўна-прыкладнога мастацтва, дакументаў, друкаваных выданняў, нумізматыкі, баністыкі, фалерыстыкі, археалогіі, зброі, прадметаў з гісторыі тэхнікі, а таксама побыту і этнаграфіі, фотадакументаў, прыродазнаўства, скульптуры.
Нядаўна музей папоўніўся новымі экспанатамі. Тумба драўляная (арэх) з элементамі керамікі і мармуру (канец ХІХ стагоддзя), кандэлябр (ХІХ стагоддзе), набор для чысткі адзення (пач. ХХ стагоддзя), сярэбраны паднос (пач. ХХ стагоддзя), лямпы – газавая і кобальтавая. Гэтыя прадметы будуць выкарыстаны для афармлення фотазон і выстаў.
Планы музея: дзе і калі можна зрабіць сэлфі?
Сёлета ў Смаргонскім гісторыка-краязнаўчым музеі пройдуць выставы, на якіх свае творы прадставяць мастакі Вячаслаў Аўгусціновіч (у лютым) і Уладзімір Бізюк (у жніўні). У красавіку адбудзецца выстава, прысвечаная 80-годдзю заслужанага дзеяча мастацтваў Беларусі Уладзіміра Церабуна. Восенню – агульная выстава, прысвечаная творчасці знакамітых людзей Смаргоншчыны: Ісака Іткінда, Аляксандра Дзяругі, Уладзіміра Роўды, Аляксандра Шыдлоўскага, Аляксандра Іванова і Анатоля Бяляўскага. Акрамя гэтага запланаваны выставы «Артэфакты Крэўскага замка» і «Сведкі мінулага і сучаснага» (сумесны праект з горадам-пабрацімам Вязьмай).
Гісторыя не стаіць на месцы: яна папаўняецца сучаснымі творамі мастакоў і знаходзіць новых прыхільнікаў праз аб’ектыў іх фотакамер. Смаргонскі музей, дзе перапляліся лёсы вялікіх князёў, таленавітых мастакоў і звычайных гарбачоў, – ідэальнае месца для фатаграфавання. Сачыце за афішай, прыходзьце і стварайце свой уласны спіс улюбёных месцаў для сэлфі ў скарбніцы гісторыі Смаргоншчыны. Пакіньце свой след – не толькі ў лічбавых альбомах, але і ў гісторыі месца, якое жыве і развіваецца дзякуючы вашай цікавасці.
Галіна АНТОНАВА
Фота аўтара і з архіва музея