Коммуналь авариялар кәмейәсәк
Башҡортостанда милли проект буйынса 175 километр коммуналь селтәрҙе ремонтлау күҙаллана.
Башҡортостанда 2026 йылда “Тормош өсөн инфраструктура” милли проектының (национальный проект “Инфраструктура для жизни”) “Коммуналь инфраструктураны яңыртыу” федераль проекты сиктәрендә 175 километр коммуналь селтәрҙәрҙе ремонтлау күҙаллана, ә артабанғы йылдарҙа күрһәткесте ике тапҡырға арттырырға мөмкин. Был хаҡта республиканың Торлаҡ-коммуналь хужалыҡ министрлығынан хәбәр иттеләр.
– 2026 йылға өҫтөнлөктәр билдәләнде. Коммуникациялар менән шөғөлләнәсәкбеҙ, 175 саҡрым самаһы инженер селтәрҙәрен ремонтларға планлаштырабыҙ, ә алдағы йылдарҙа яңыртыуҙар һанын 400 саҡрымға еткерәсәкбеҙ. Селтәрҙәр күберәк эшләгән һайын, авариялар ҙа әҙерәк була, — тине Башҡортостан Хөкүмәте Премьер-министры Андрей Назаров.
Был күләмдән тыш, ағымдағы йылда 181 километр селтәрҙе ремонтлауҙы дауам итеү планлаштырыла: был эштәр бюджет кредиттары буйынса республика бурысының өстән ике өлөшөн иҫәптән сығарыу иҫәбенә финанслана.
Территорияларҙы үҫтереү фонды мәғлүмәте буйынса, Башҡортостан 2024-2025 йылдарҙа ремонтланған инженер селтәрҙәре оҙонлоғо буйынса төбәктәр араһында II урынды биләне: ике йыл эсендә республикала 269,3 саҡрым коммуникациялар яңыртылды. Түбәнге Новгород өлкәһендә генә беҙҙән күберәк эшләнә.
Йылылыҡ һәм һыу менән тәьмин итеү селтәрҙәре оҙонлоғо буйынса Башҡортостан Республикаһы Волга буйы федераль округында – икенсе, ә канализация оҙонлоғо буйынса етенсе урында тора. Төбәктә коммуналь инфраструктураның уртаса туҙыуы 54 процент тип баһалана, ә ил буйынса уртаса күрһәткес 60 процент.
Яңыртылған милли проекттар Рәсәй Президенты Владимир Путиндың указына ярашлы 2025 йылдан тормошҡа ашырыла.
Фото: "Башинформ".
Беҙҙең МАХ каналына https://max.ru/gazetabashkortostan ҡушылығыҙ!