Навечерие Богоявления (Крещенский сочельник)
Тропарь, глас 4
Возвраща́шеся иногда́ Иорда́н река́ ми́лотию Елисе́евою,/ возне́сшуся Илии́,/ и разделя́хуся во́ды сю́ду и сю́ду/ и бысть ему́ сух путь, и́же мо́крый,/ во о́браз вои́стинну Креще́ния,/ и́мже мы теку́щее жития́ прехо́дим ше́ствие:// Христо́с яви́ся во Иорда́не, освяти́ти во́ды.
Кондак, глас 4
Во струя́х днесь Иорда́нских быв, Госпо́дь/ Иоа́нну вопие́т:/ не убо́йся крести́ти Мя,/ спасти́ бо приидо́х// Ада́ма первозда́ннаго.
Сщмч. Феопе́мпта, епископа Никомидийского и мч. Фео́ны (в Крещении Сине́сия) волхва (303)
прп. Синклитики́и Александрийской (ок. 350)
прп. Симео́на Псково-Печерского (1960)
Тропарь, глас 1
Любо́вию Христо́вою се́рдце твое́ уязви́вый,/ ева́нгельски Тому́ после́довал еси́:/ я́ко дре́вний подви́жник преподо́бием украси́выйся,/ сла́вный насе́льник оби́тели Богома́тери у пеще́р Бо́гом зда́нных яви́лся еси́,/ и, благода́ть духо́вную свы́ше прие́мь,/ подае́ши ве́рным исцеле́ния,/ Симео́не богоблаже́нне,// не преста́й моли́тися о чту́щих тя.
Кондак, глас 4
Я́ко Бо́жия любве́ зерца́ло,/ во оби́тели Пече́рстей благода́тно просвети́лся еси́,/ о́браз и́ноческаго жития́ показу́я,/ трудолю́бием и послуша́нием на высоту́ доброде́телей восте́кл еси́./ Те́мже, да́ры Ду́ха Свята́го от Го́спода почте́нный,/ чудеса́ мно́га ще́дро источа́еши,/ преподо́бне о́тче наш Симео́не,// моли́ спасти́ся душа́м на́шим.
Молитва
О, вели́кий уго́дниче Бо́жий, преподо́бне о́тче Симео́не! При́зри на нас гре́шных, ко святе́й ико́не твое́й припа́дающих и прося́щих твоего́ заступле́ния и по́мощи. Скорбь бо обдержи́т нас от обстоя́щих нас ны́не бед и зол, и утеше́ния не и́мамы многоболе́зненным душа́м на́шим. Иска́хом бо по́мощи от челове́к, и не обре́теся. Вопия́хом ко Го́споду, и не услы́ша нас, зане́ прогне́вах пречи́стую бла́гость Его́ беззако́ньми на́шими, и мно́жеством мно́гих грехо́в на́ших преогорчи́хом человеколю́бную утро́бу Его́. И кто нам ны́не по́мощь яви́т, кто нам скорбь утоли́т, кто даст отра́ду и успокое́ние многомяте́жным душа́м на́шим? К тебе́, вели́кий уго́дниче Бо́жий, прибега́ем мы, гре́шнии и недосто́йнии, ве́дуще бо, я́ко ве́лие дерзнове́ние и́маши ко Христу́ Бо́гу, и многомо́щен предста́тель еси́ о всех, с ве́рою к тебе́ прибега́ющих и твоего́ заступле́ния и по́мощи тре́бующих. Моли́ у́бо Человеколю́бца Го́спода, я́ко да прости́в нам безчи́сленная на́ша прегреше́ния, не отврати́т ми́лость Свою́ от нас, но я́ко благ и сострада́телен, яви́т и нам безконе́чное Свое́ милосе́рдие, и в лю́тем напа́стей и бед на́ших озлобле́нии пода́ст нам всеси́льную по́мощь Свою́, и преогорче́нным душа́м на́шим осла́бу, мир, укрепле́ние, утеше́ние и успокое́ние да́рует. Ей, вели́кий уго́дниче Бо́жий! Вознеси́ преподо́бнии ру́це твои́ ко Христу́ Бо́гу на́шему и моли́ бла́гость Его́, да не отри́нет моле́ния серде́ц на́ших, недосто́инства ра́ди на́шего, но да яви́т нам благовре́менне ми́лость Свою́, да та́ко в ми́ре вре́менное сие́ житие́ преше́дше, в ве́чный дости́гнем поко́й, и с тобо́ю удосто́имся сла́вити Отца́ и Сы́на и Свята́го Уте́шителя Ду́ха во ве́ки веко́в. Ами́нь.
Прор. Михе́я (IX в. до Р. Х.)
прп. Аполлина́рии (ок. 470)
прп. Фости́рия
прп. Ми́ны Синайского (VI)
прп. Григо́рия Акри́тского (ок. 820)
Сщмч. Андрея Зимина, протоиерея (1920)
Тропарь, глас 5
Земли́ Дальневосто́чныя прозябе́ние/ и о лю́дех ея́ те́плый моли́твенниче,/ хра́мов Бо́жиих усе́рдный строи́телю/ и благоче́стия неле́ностный учи́телю,/ священному́чениче Андре́е,/ ве́рою воспева́ем труды́ и по́двиги твоя́,/ во дни гоне́ний и бра́ни сме́ртию за Христа́ увенча́нныя./ Ты же, Престо́лу Бо́жию предстоя́,/ приле́жно моли́ся Го́сподеви // спасти́ся душа́м на́шим.
Кондак, глас 6
Уссури́йския па́ствы до́брый наста́вниче,/ священному́чениче Андре́е,/ первозва́нному апо́столу в креще́нии соиме́нный,/ тве́рдей ве́ре того́ подража́л еси́/ и, селе́ния окре́стная обходя́,/ жи́зни во Христе́ лю́ди науча́л еси́,/ в годи́ну же страда́ний земли́ Ру́сския,/ благода́тию Госпо́днею укрепля́емь,/ терпе́ние мук па́че ума́ яви́л еси́,/ ны́не же, на Небесе́х с новому́ченики Бо́гу предстоя́, // моли́ спасти́ся душа́м на́шим.