🤩Гродзенская дыяцэзія расказала пра дабрачынныя візіты, якія супрацоўнікі і валанцёры каталіцкага таварыства «Caritas» здзейснілі ў перыяд Нараджэння Пана
Як паведамляе прэс-служба дыяцэзіі, у святочныя дні прадстаўнікі «Caritas» Гродзенскай дыяцэзіі наведалі сем’і, што апынуліся ў складаных жыццёвых абставінах, шматдзетныя сем’і, дзяцей з інваліднасцю, а таксама людзей з цяжкімі захворваннямі.
Паводле слоў прадстаўнікоў таварыства, «кожны візіт быў напоўнены цеплынёй і святлом». Удзел у сустрэчах прымаў Святы Мікалай, які дарыў дзецям падарункі і ладзіў святочнае прадстаўленне, выклікаючы ўсмешкі і радасць.
«Для бацькоў гэта стала знакам падтрымкі і надзеі, а для дзяцей — сапраўдным святам, якое яны будуць памятаць яшчэ доўга, — удзячныя позіркі бацькоў сведчылі пра тое, што нават невялікая ўвага і клопат могуць стаць вялікай падтрымкай у цяжкі час. Гэтая акцыя яшчэ раз паказала, што хрысціянская любоў і міласэрнасць здольныя перамяняць сэрцы і прыносіць святло туды, дзе яго так чакаюць».
— паведамляюць прадстаўнікі «Caritas».
У таварыстве таксама падкрэсліваюць, што «дабрачынная дзейнасць “Caritas” — гэта не толькі матэрыяльная дапамога, але і сведчанне веры, якая дзейнічае праз любоў». Паводле іх слоў,
«у кожным наведванні адчувалася прысутнасць Хрыста, які праз простыя жэсты дабрыні і спагады набліжаецца да тых, хто мае патрэбу ў падтрымцы».
На заканчэнне «Caritas» выказвае шчырую падзяку ўсім, хто далучыўся да падрыхтоўкі і правядзення акцыі: супрацоўнікам, валанцёрам, дабрачынцам і неабыякавым людзям. «Менавіта дзякуючы вашай падтрымцы і адкрытым сэрцам стала магчымым прынесці радасць і надзею тым, хто асабліва мае ў гэтым патрэбу».
Фота: Гродзенская дыяцэзія
