Бер күрешеү – үҙе бер ғүмер
Ватан һағында торған һалдаттың – яратҡан тормош иптәшеңдең, хәстәрлекле атай һәм кейәүҙең алғы һыҙыҡтан байрамға ҡайтыуы ғаилә өсөн икеләтә шатлыҡ.
Яңы йыл байрамын бергәләп ғаилә менән ҡаршылауҙан да күңелле мәл юҡтыр. Ватан һағында торған һалдаттың – яратҡан тормош иптәшеңдең, хәстәрлекле атай һәм кейәүҙең алғы һыҙыҡтан байрамға ҡайтыуы ғаилә өсөн икеләтә шатлыҡ.
Федоровка районының Үрге Яуыш ауылында тыуып үҫкән, район ойошмаларының береһендә етәксе вазифаһын биләгән уҙаман, махсус хәрби операция башланғас, ил яҙмышы хәл ителгәндә үҙенең ситтә тороп ҡала алмаясағын аңлай. “Ҡайнар” нөктәләрҙә хеҙмәт итеү тәжрибәһенең унда ла файҙалы булыу мөмкинлеген белә. Белеме буйынса ветеринар булғанлыҡтан, медицина ярҙамы күнекмәләренә эйә булыуы ла ныҡлы ҡарар ҡабул итеүгә этәрә, тип яҙа “Ашҡаҙар таңдары”.
Ысынлап та, ул батальондың медицина взводына эләгә, өҫтәмә хәрби әҙерлек үтә. “Кореш” позывнойлы сержант санинструктор, медицина взводы бүлексәһе командиры вазифаларын атҡара. Уларҙың батальоны әле ауыр һуғыштар барған Херсон өлкәһендә. “Беҙ беспилотниктарға ҡаршы көрәшергә өйрәндек. Ә улар ике яҡтан да бик күп. Һыуыҡтарҙы үткәреү өсөн йылы кейемдәребеҙ бар. Әле беҙ торған ерҙә ул тиклем түгел, төньяҡтараҡ һалҡыныраҡ. Блиндаждарҙа, подвалдарҙа, ғәҙәттә, окоп шәмдәрен файҙаланабыҙ, улар аҙ булһа ла йылылыҡ бирә. Гуманитар ярҙам килеп тора, унда кәрәк-яраҡ етерлек була.
Отпуск графикка ярашлы бирелә. Егеттәрҙә рухи көс, сыҙамлыҡ етерлек, тыуған йорт, туғандар ярҙамы уларҙың күңелен йылыта, дәрт өҫтәй”, – ти яугир. “Кореш” ул яҡта климаттың йомшаҡлығын, тупраҡтың уңдырышлығын, ерҙең йомартлығын билдәләй.
Тыуған йортонда ла шәхси хужалыҡ булыуы, ҡатынының үҙ мәшғүл булараҡ бөтә эште алып барыуы менән ҡәнәғәтлеген белдерә. Мал-тыуар аҫрайҙар, иген сәсеү өсөн ерҙәре бар. “Кәрәк саҡта ярҙам ҡулы һуҙыусылар табыла, тик беҙ кеше ваҡытынан, көсөнән файҙаланырға яратмайбыҙ, үҙебеҙ йырып сығырға күнеккәнбеҙ. Балалар ҙа ярҙам итә”, – ти яугир. Өлкән ҡыҙҙары медицина вузында белем ала, кескәйҙәре техник колледжда уҡый. Улар алдағы яңы йылдарҙы ла бергә үткәрергә, йышыраҡ аралашырға, бәхетле мәлдәрҙе күберәк кисерергә теләй. “Кореш” яҡташтарын Яңы йыл менән ҡотлап, ихлас ярҙамдары өсөн рәхмәт белдерә, уларға именлек, һаулыҡ теләй.
Хәтерегеҙгә төшөрәбеҙ, контракт төҙөү мәсьәләләре буйынса республика халҡы берҙәм 177 белешмә номеры буйынса, 122 йәки (347) 218-19-19-19 телефондары аша Ситуация үҙәгенә, “Минең документтарым” күп функциялы үҙәктең яҡындағы офисына мөрәжәғәт итә ала. Шулай уҡ һорауҙарға яуапты башбат.рф сайтында, контракт буйынса хәрби хеҙмәткә инергә теләүселәр өсөн һәм уларҙың ғаилә ағзаларына социаль ярҙам саралары тураһында "Телеграм"да мәғлүмәт таба алаһығыҙ. Башҡортостанда контракт буйынса хәрби хеҙмәткә саҡырыу дауам итә. Мобиль пункттар республиканың барлыҡ ҡала һәм райондарында эшләй.
Беҙҙең МАХ каналына https://max.ru/gazetabashkortostan ҡушылығыҙ!
Гөлрайхан Баҡыева фотоһы.