Лаҡлы ауылында табип амбулаторияһы асылды
Был амбулаторияла терапевт, педиатр, стоматолог кабинеттары, ике урынға иҫәпләнгән көндөҙгө стационар, процедура, прививка яһау, дарыухана, регистратура һәм ярҙамсы биналар бар.
Лаҡлы ауылында “Оҙайлы һәм әүҙем тормош” милли проекты (национальный проект “Продолжительная и активная жизнь”) ярҙамында яңы амбулатория асылды, тип хәбәр итә Салауат районы хакимиәте.
Был амбулаторияла терапевт, педиатр, стоматолог кабинеттары, ике урынға иҫәпләнгән көндөҙгө стационар, процедура, прививка яһау, дарыухана, регистратура һәм ярҙамсы биналар бар. Ике төп инеү урыны пандустар менән йыһазландырылған. Табип амбулаторияһында Лағыр һәм Лаҡлы ауыл биләмәләрендә йәшәүселәргә медицина ярҙамы күрһәтеләсәк.
– Хәҙер бында балалар һәм өлкәндәр медицина ярҙамы һорап мөрәжәғәт итә ала. Башҡортостан Республикаһы Хөкүмәтенә һәм Һаулыҡ һаҡлау министрлығына ярҙам өсөн ихлас рәхмәт белдерәм. Һәр кешегә һаулыҡ теләйем һәм уларҙың фельдшерға мөмкин тиклем һирәгерәк килеүен теләйем, – тине Салауат районы хакимиәте башлығы Марс Кашапов.
“Оҙайлы һәм әүҙем тормош” милли проектының төп маҡсаты – граждандарҙың оҙон ғүмерлелегенең яңы күрһәткестәренә өлгәшеү. 2030 йылға көтөлгән ғүмер оҙайлығын 78 йәшкә тиклем, ә 2036 йылға 81 йәшкә тиклем арттырыу планлаштырыла. Милли проект ярҙамында медицина учреждениелары яңыртыла, реабилитация системаһы камиллаштырыла, милли тикшеренеү үҙәктәре селтәре үҫешә, һаулыҡ һаҡлауҙы һанлаштырыу буйынса эш алып барыла.
Яңыртылған милли проекттар Рәсәй Президенты Владимир Путиндың ҡарары буйынса 2025 йылдан тормошҡа ашырыла.
Фотолар: Малаяҙ район дауаханаһының матбуғат хеҙмәте.
Беҙҙең МАХ каналына ҡушылығыҙ: max.ru/gazetabash...
