🪶19 студзеня 2013 года пры загадкавых абставінах загінуў гродзенскі журналіст і паэт Юры Гумянюк
🦌 Юрый нарадзіўся ў Гродне 24 верасня 1969 года. Скончыў Гродзенскі дзяржаўны ўніверсітэт імя Янкі Купалы, дзе вывучаў паланістыку. Некаторы час працаваў у Гродзенскім тэатры лялек загадчыкам літаратурнай часткі, быў журналістам у газетах «Пагоня» і «День», а таксама супрацоўнічаў з беларускай службай Польскага радыё і «Радыё Рацыя» пад псеўданімам Вацлаў Галімскі.
📖 Юрый — аўтар паэтычных кніг «Водар цела» (1992), «Твар Тутанхамона» (1994), «Рытуал» (1999), «Вуліца тыгровых архідэй» (2003) і раману «Апосталы нірваны» (1995). Шмат ягоных вершаў сталі песнямі беларускіх рок-гуртоў, такіх як «Грунвальд» і «Айша».
🖋Быў сябрам Таварыства вольных літаратараў, Саюза беларускіх пісьменнікаў і Беларускага ПЭН-цэнтра. Улетку 2011 года Гумянюк быў арыштаваны на 12 сутак за ўдзел у маўклівых пратэстах у Гродне.
👵🏻 Жыў у Гродне, дзе даглядаў сваю маці.
💥 Загінуў пры загадкавых абставінах, выпаўшы з акна 9-га паверха гродзенскага інтэрната па вуліцы Сухамбаева, што знаходзіўся побач з яго домам. Прычыны смерці дагэтуль застаюцца невядомымі: ці гэта было самагубства, забойства або няшчасны выпадак. Пахаваны на могілках Сакрэт у Гродне.
Нас абрубілі на высокай ноце,
І мы цяперака знаходзімся ў цэйтноце,
Як мухі п’яныя на тлустым бэгемоце,
Ці як жарынкі на патухлым кноце.
Мы ўсё жыцьцё чакаем новых цудаў,
Жытло шыкоўнае будуем для прыблудаў,
І молімся штодня на чэрап юдаў,
Гукаючы: «Няхай жыве краіна хлудаў!»
Не дачакацца нам ніколі дабрадзея,
Калі ня ўздымемся, дык у скрусе пасівеем.
Давайце ж станем мастакамі дзеі,
Пакуль у сэрцах ёсьць нязгаслая надзея!
Гвалтаўнікі, што чыняць перашкоды,
Уласнаручна зьнішчаць свае стоды,
Пасьля патрапяць пад абцасы моды,
А мы адчуем корсткі смак свабоды.
2001
Чытайце таксама:
У Гродне загінуў паэт і журналіст Юрый Гумянюк: яго ўзгадваюць сябры і блізкія
