Бөтә ҡалалар ҙа уңайлы тип танылды
Эш артабан дауам итә.
Башҡортостандың 21 ҡалаһы уңайлы ҡала мөхите булған ҡалалар рейтингына индерелгән. Был хаҡта Башҡортостан Башлығы Радий Хәбиров “Тормош өсөн инфраструктура” милли проектының “Уңайлы ҡала мөхитен булдырыу” федераль проектын тормошҡа ашырыу йомғаҡтарын яһағанда телгә алды.
Республиканың бөтә ҡалалары ла йәшәү өсөн уңайлы тип табылған. Һуңғы йылдарҙа Башҡортостанда бындай ҡалалар һаны артҡан. Әгәр 2018 йылда улар ни бары алтау булһа, 2023 йыл йомғаҡтары буйынса 17 ине, хәҙер был рейтингҡа тәүге тапҡыр 21 ҡала ла ингән. Алты йыл эсендә Башҡортостанда уңайлы ҡала мөхите булған ҡалаларҙың өлөшө 33 проценттан 100 процентҡа тиклем артҡан. Шул уҡ ваҡытта Өфө 251 балл йыйып, Санкт-Петербург һәм Мәскәүҙе лә индереп, Рәсәйҙең иң яҡшы биш миллионлы ҡалаһы иҫәбенә инде. Башҡортостандың торлаҡ-коммуналь хужалыҡ министры Ирина Голованова хәбәр итеүенсә, Башҡортостанда йыл һайын йәмәғәт биләмәләрен төҙөкләндереүгә һәм ҡалаларҙа һәм ауылдарҙа уңайлы мөхит булдырыуға ҙур иғтибар бүленә.
– Яңы милли проектты тормошҡа ашырыу дауам итә. 2025 йылда Уңайлы ҡала мсөхитен булдырыу программаһына бөтәһе 1,2 миллиард һум йүнәлтелгән, — тине Ирина Голованова. – Федераль бюджет аҡсаһы иҫәбенә 100 йәмәғәт биләмәһе төҙөкләндерелде, 70 биләмә республика һәм урындағы бюджеттарҙан финансланған башҡа программалар ярҙамында, шулай уҡ бюджеттан тыш средстволар ҡатнашлығында тормошҡа ашырылды.
Бөтә төҙөкләндереү объекттары бөтә Рәсәй тауыш биреү йомғаҡтары буйынса билдәләнә, тине министр. 2025 йылда муниципалитеттар тауыш биреүҙә ҡатнашыу өсөн 241 территория тәҡдим итә, алты биләмә беренсе тапҡыр граждандар тарафынан тәҡдим ителә. Тауыш биреү йомғаҡтары буйынса 144 территория еңеүсе тип танылған.
– Был объекттарҙы 2026 йылда төҙөкләндереү планлаштырыла, был маҡсатҡа федераль бюджеттан 1,2 миллиард һум самаһы аҡса бүленгән. 2026 йыл программаһы башланды ла инде. Муниципаль берәмектәр төҙөкләндереү проекттарын әҙерләгән, конкурс процедуралары башланған, — тине Ирина Голованова.
Фото: "Башинформ".
Беҙҙең МАХ каналына https://max.ru/gazetabashkortostan ҡушылығыҙ!