Шәмбе көнө Күмертау ҡалаһында сираттағы уҡ атыу бәйгеһе уҙҙы

Шәмбе көнө Күмертау ҡалаһында сираттағы уҡ атыу бәйгеһе уҙҙы. Һәр ваҡыттағыса Баймаҡ мәргәндәре байтаҡ ҡына булды. Бәйге бик матур, еренә еткереп ойошторолдо. Беренсе президентыбыҙ Мортаза Рәхимов исемендәге 3-сө һанлы Башҡорт гимназияһының иркен, яҡты спорт залында үтте. Республиканың төрлө төбәгенән уҡсылар көс һынашты. Бәйге башҡорт халҡының рухын күтәреүсе, батыр һәм ғорур итеүсе "Урал" йырын ҡурайыбыҙҙа тыңлау менән асылды. Милли кейемдәге ир-азаматтарыбыҙ менән һылыу ҡатын-ҡыҙҙарыбыҙ сараға сағыу йәм өҫтәне. Мәктәп директоры саф башҡортса бәйгеселәрҙе тәбрикләне, лайыҡлы еңеүҙәр һәм уңыштар теләне. Гимназия уҡыусыһының ҡумыҙҙа уйнап "Уралым"ды башҡарыуы дәрт һәм көс өҫтәне.

Бына бәйге башланды. Уҡсылар тигеҙ сафтарға баҫып, бер-бер артлы уҡ сойорғоталар. Ярыштарҙа күҙәтеүемсә, мәргәндәр сафы арта, ҡулдарына яңы уҡ-һаҙаҡ алыусылар күренә. Сихри көс, дәрт уҡ атыу майҙансығын ялмап ала. Ярыш ҡыҙғандан ҡыҙа. Ауыртыу-һыҙланыуҙар, тормош ығы-ығылары юҡҡа сыға. Уҡсылар үткәндә лә, киләсәктә лә түгел, хәҙерге әлеге ысынбарлыҡта йәшәй.

Эйе, Баймаҡ уҡсылары ел-дауыл ҡуптара. Ғәҙәттәгесә барыһы ла финалға үтәләр. Ярым финалда бер-береһе менән көс һынашалар. Бәйгеләрҙән бәйгеләргә мәргәнлеген арттырып, Баймаҡ уҡсыһы Нурмөхәмәт мәргән дүртенсе урынды яуланы.

Алтын финал. Ике Баймаҡ ир-азаматы, ике синыфташ аяҡтарына ныҡлы баҫып, уҡтарын сәпкә тоҫҡай. Тынлыҡ. Уҡтар һыҙғырып оса. Был бәйгелә уңыш Илфат мәргәнгә йылмайҙы. Күп бәйгеләрҙә ал бирмәгән Ғәфүр мәргән икенсе еңеү баҫҡысын биләне.

Ҡатын-ҡыҙҙарыбыҙ араһында көсөргәнешле бәйгелә Имангөл һылыуыбыҙ иң юғары баҫҡысты биләне.

Күмерселәр ҡалаһында өс этапта үткән бәйгенең дә алтын миҙалын һәм кубогын Илфат мәргәнебеҙ яуланы. Бәйге тамам. Бәйгеселәр уҡ-һаҙаҡтарын ҡулдарына алып бер урынға тупланалар. "Башҡорт халҡына хеҙмәт итәм!" Уҡсылар күкрәгенән сыҡҡан оран, тау-урмандар аша ҡитғаларға тарала.

Уҡ атыу, атта йөрөү, һыуҙа йөҙөү динебеҙҙә сөннәт һынала. Тимәк, нисә йәштә булыуыбыҙға, һаулығыбыҙ торошона ҡарамай был спорт төрҙәре менән шөғөлләнергә, бәйгеләрҙә ҡатнашырға мөмкин. Бөтәһелә бары тик ниәттән һәм ихласлыҡтан тора.

Ышанғы килә. Килер бер көн, Баймаҡ ҡалаһының ҡап уртаһында бөтә уңайлыҡтары булған уҡ атыу һарайы балҡып ултырыр.

Айҙар Күсеев.