🧺 У Гродзенскім музеі паказалі календары XVIII стагоддзя з рухомымі дэталямі і астралогіяй
У фондах Гродзенскага дзяржаўнага гісторыка-археалагічнага музея захоўваецца ўнікальная калекцыя старажытных календароў XVIII стагоддзя. У экспазіцыі прадстаўлены 24 выданні, надрукаваныя да 1800 года, узрост якіх перавышае два стагоддзі, паведамляе sb.by.
У той час Гродна лічыўся адным з цэнтраў кнігадрукавання: у горадзе дзейнічала каралеўская друкарня, у сценах якой былі выдадзены два календары, што сёння ўваходзяць у музейны збор.
Асаблівую ўвагу ў калекцыі прыцягваюць календары на 1778 і 1785 гады. Яны надрукаваныя ў традыцыйным для таго часу кішэнным фармаце — 10×16. Пачэснае месца ў экспазіцыі займае Кракаўскі каляндар на 1717 год, якому ўжо 300 гадоў.
Календары мінулых стагоддзяў істотна адрозніваліся ад сучасных — як формай, так і зместам. Акрамя табліц з падзелам па месяцах, верстальшчыкі змяшчалі на старонках і даведачную інфармацыю. Тыповы прыклад — «вечны каляндар», які, апроч дзён і месяцаў, утрымліваў астралагічныя звесткі.
«На некалькіх частках календара можна ўбачыць надпісы на польскай мове. Таксама там выяўлены фігуры Сатурна, багіні Месяца Селены і бога Сонца Геліёса. Каляндар нестандартны: ён утрымлівае і рухомыя часткі ў выглядзе шасцярэнькі, на якія нанесены назвы рэлігійных святаў на кожны месяц, знакі задыяка і дні месяца»,
— распавядае кіраўніца аддзела гісторыі краю Гродзенскага дзяржаўнага гісторыка-археалагічнага музея Наталля Трэцякевіч.
Старажытныя календары мелі практычную карысць для сваіх уладальнікаў. Уявіць, як яны выглядалі больш за 200 гадоў таму, можна ў пастаяннай экспазіцыі Гродзенскага дзяржаўнага гісторыка-археалагічнага музея.
