🤩 Сёння адзначае сваё 80-годдзе ўраджэнец Гродзеншчыны, знакавая постаць Каталіцкай Царквы Беларусі і былы Арцыбіскуп-Мітрапаліт Мінска-Магілёўскі
😇 3 студзеня 1946 года ў Адэльску Гродзенскага раёна нарадзіўся Тадэвуш Кандрусевіч — знакавая постаць беларускага Касцёла, вядомы сваёй актыўнай дзейнасцю па аднаўленні рэлігійнага жыцця ў Беларусі.
🦌 У 1962 годзе паступіў на фізіка-матэматычны факультэт Гродзенскага педінстытута, але праз год вымушаны быў сысці з-за абвінавачванняў у наведванні касцёла. Пасля год працаваў у праектна-будаўнічай арганізацыі ў Гродне.
⛪️ У 1976 годзе вырашыў прысвяціць жыццё служэнню Богу, паступіўшы ў Ковенскую духоўную семінарыю. У 1981 годзе быў пасвечаны ў святары, а ў 1989 годзе стаў біскупам. Ён актыўна аднаўляў каталіцкія структуры ў Беларусі, спрыяў адкрыццю больш за 100 касцёлаў і заснаваў Гродзенскую вышэйшую духоўную семінарыю.
⛓️ Асаблівую ўвагу Кандрусевіч надаваў сацыяльнай справядлівасці і правам чалавека. Пасля падзей 2020 года, звязаных з фальсіфікацыямі на прэзідэнцкіх выбарах і жорсткім разгонам пратэстаў, ён неаднаразова звяртаўся да ўладаў з заклікамі да канструктыўнага дыялогу і спынення гвалту. У жніўні 2020 года ён маліўся пад сценамі ізалятара на Акрэсціна, дзе адбываліся катаванні мірных грамадзян.
🚌 Пасля вяртання з паездкі ў Польшчу 31 жніўня 2020 года беларускія ўлады адмовілі яму ва ўездзе ў краіну, спаслаўшыся на «несапраўднасць» яго пашпарта. Гэты крок выклікаў шырокую крытыку з боку міжнароднай супольнасці і Каталіцкай Царквы.
🇻🇦Толькі пасля асабістага ўмяшання Папы Рымскага і візіту прадстаўніка Ватыкана ў Беларусь Кандрусевічу дазволілі вярнуцца на радзіму ў снежні 2020 года. Аднак яго пастырская дзейнасць была значна абмежаваная.
🤩3 студзеня 2021 года, у дзень свайго 75-годдзя, ён падаў прашэнне аб адстаўцы, якое было прынята Папам Францыскам. Зараз Кандрусевіч працягвае актыўнае жыццё, застаючыся важнай постаццю ў беларускім Касцёле і сімвалам супраціву гвалту.
Шчыра віншуем Яго Эксцэленцыю з Днём нараджэння і зычым доўгіх гадоў жыцця.
