Тшӧтшӧритны - быдлаӧт ветлӧтны, кошшисьны, видзӧтчыны. Любовь Косова-Старцева Редактор рассказа Любовь Косова-Старцева: "Ме мыйкӧ кери рассказ ладорӧ. Аслым бура оз гленытчы. Коліс бы эшӧ видзӧтны, да Виль год вӧтӧ, коккезӧс тальӧ. Долгсӧ дынам ог бы коль.
Концовкаыс дзик кузьӧв. Видзӧтӧ, может, ме не сідз кери. Ме эд асмознам висьтаси."
ВЕТЛӦТІСЬ КЕРКУЭЗ
висьт
Сёр арся лунö ме да менам ёрт Ключов Толик, кыдз пыр, тшӧтшӧритім деревня гӧгӧрсӧ и кылім юöр, Лиса тёткалісь керкусö пö, разьтöг, Кокольӧсь деревнясис мöдöны вайöтны миянö, Дейко деревняӧ.
Мийö Толиккöт пöндім тöдмавны – кыдз вайöтны?
Кыдз сія пондас ачыс мунны?
Кыдз ю вылöт корабль, пондас уйны туй вылöт, ыбез вылöт?
Или лым вылöт ыскöвтны?
Сідз и эг вермö вежöртны, баитчим юасьны маммезнымлісь, ашын ветлыны видзöтны. Рытьявнас янсöтчим, сія - гортас, и ме – гортö.
Гортö пырикö бöра видзöтышті керку дынісь виль столб вылö, радуйчышті – бур, кöр гортын лоис югыт.
Кöр деревняас пондісӧ сувтӧтлыны электричество понда столббез, мамöлö висьталісö керку дынас гарйыны столб яма да мыччалісӧ кытчӧ гарйыны. Мийӧ мамӧкӧт кыкӧн гарйим столб ямасӧ.
Мамӧ ачыс вӧлӧн ветліс вайны столб, сыбöрын локтісӧ деревнясис мужиккез и столбсӧ сувтӧтісӧ.
Электриккез нюжлалісӧ проводдез, и миян лоис электрическӧй би.
Ашынас, одз асывнас, эшӧ вӧлі пемыткодь, мийӧ котӧртім Кокольӧсь деревняас Лиса тётка ордö. Пырим керкуö да сетім сылӧ мамезнымсянь козиннэз.
Менам мамӧ пӧрись мортлӧ ыстіс горись кыскӧм пым чӧвпан, кöдö пöжаліс колхознӧй пизись, а ёртӧ вайӧма пуӧм картошкаэз. Нія эшӧ абу и сайкалӧмась.
Лиса тетка шӧраліс мамöлісь чӧвпансӧ, вундаліс пуӧм картошкасӧ да солонка сувтӧтіс. Корис миянӧс пызан сайяс, а ачыс гудыртіс комын. Пыртіс пес, сюйис горö, сюйыштіс горас би; курӧггезлӧ, кöдна олісö горöдз увтас, сетіс кокавны сю.
Недыр-мыйись пырис керкуас бригадир Митрей Степан. Видзӧтіс, бура я асыкалӧмась горсӧ геззэзӧн, бура я крепитöмась геззэсö вӧскас. Петіс ӧтӧрӧ. Мийö – бöрсяняс, и сэсся сы дынісь кальк эг керö - кытчӧ бригадир, сэтчö и мийӧ Ключов Толиккöт.
Митрей Степан гӧгӧртіс керкусӧ да чер ӧбукöн сӧталіс-пешліс керрезісь полозэз, кöдна вылö тöн мужиккез сувтöтöмась керкусö. Висьталіс миянлö, тӧн пö мужиккез домократтэзӧн лэбтыштöмась керкусö да увтас сюйöмась керрез-полоззэз.
Ровно кыдз пуксьӧтӧмась керкусӧ ыджыт додь вылӧ: кык кер доль, да кык кузь кер поперёг тшупӧттэзӧн замокалӧмась.
Керресӧ (керку гӧгӧрас) кытшӧвтӧмась тросӧн, троссӧ поммесö нюжӧтӧмась, медбы тракторрез бердӧ кышавны.
Митрей Степан, керку гöгöр ветлöтікö, и миянлö адззис удж. Корис хозяйкалісь кык важ нинкöм воннезöн, сетіс миянлö и тшöктіс керку бöрсянь кыскыны суседку гозъяöс. И висьталіс, кыдз сійö керны.
Недыр-мыйись локтісӧ кык трактор, ӧтыс ыджыт - С100, а мӧдыс учӧтжык - ДТ -75.
Мужиккез сьӧрсьӧн - бӧрсьӧн кышалісӧ троссэсö тракторрес бердӧ и тракторрез жагвыв вöрзьöтчисö, керкусӧ местасис вӧрзьӧтісӧ и пондісӧ кыскыны. Сёр арся кынмöм да лымьялöм му вылöт полоззэз жагвыв ыскöвтісö.
Кыдз керку мыніс (вешшис) джоджулыс весьтісь, мийӧ нинкӧммезас тэчим мудйӧт вылісь му, тшöктім пуксьыны сэтчö тыдавтӧм суседку гозьяöс да пондім кыскыны нинкоммесö воннезӧтяс керкуыс сьӧрӧ.
Тракторрез жагвыв гурйисӧ-мунісӧ Дейко деревняӧ, ны бöрсянь, öтлаын хозяйканас, ыскöвтіс керку, трубасис сё эшö кайис тшынок, а мийö бöрсяняс, кыдз бариннэзöс каретаын, кыским сусудку гозъяöс.
Кӧр керкуыс сувтас виль места вылас, сэк нинкӧмессӧ мунас да суседкуэзнас чапкамö виль джоджулас, кыдз висьталіс миянлö Митрей Степан.
Мийö мунімö тракторрез бöрсянь гажöна, бытьтö орсімö кытшöмкö виль орсанöн. И эг думайтö, кыдз сэтчин керку пытшкас, Лиса тетканым – полö я, оз я, кыдз сэтчин лонтісян горыс – эз я, вöрöттöняс, уськöт бичир да öзйы, эзö я курöггэс сэтчин повзьö да репалö.
Петім деревнясис, видзöтöтыштім бöраным кольччöм деревня вылö – гажтöм лоис. Овтöм керкуэз гажтöма видзöтісö бöрсяняным пустöй, пемыткöдь öшыннэзöн-синнэзöн, дзик корисö: эд кöльö миянöс, эд чапкö.
Керкуэз улич вылас вöлісö не быдöс. Мукöд керку местаын вöлісö только джоджув ямаэз да киссьöм карчйöррез - нійö вöлі эшö жальжык. Но некин ны вылö эз видзöт, некин эз жалейт.
Асывнас, тракторресö видзчисикö, Митрей Степан висьтасис, эстöн пö вöлöма ыджыткодь деревня – куимдас гöгöр керку. Кокольöсьнас пö деревнясö шуöмась коколя юра мужик сьöрті, кöда медодз пондöм овны деревняас. А öні вот пустамис…
А оланыс деревнялöн кусöма сійöн, мыля татчö, учöт деревняö, абу вайöтöмась электричество. Сельсоветсис депутатэз шуасӧ Кöкольöсь да эшö уна учöтик деревня разьны да нуöтны öтік ыджыт деревняö, сэтчин лоас электричество, и школа, и быдöс, мый колö.
И мунöмась деревнясис кин кытчö. Уна семьяэз чапкöмась ассиныс керкуэз, вербуйтчӧмась Крымӧ да Сибирӧ, нылöн керкуэз сё эшö сулалöны-гажтöмччöны.
Мукöд хозяин-хозяйка горттэзнысö разьöмась да нуöтöмась ыджыт деревняэзö. Öтік керку кольччис овны Кокольöсьын - Улю нима инькалöн, кöдалöн сизим учӧт пиян. Сылö некöр вöлі деревня йылісь печалитчыны, коліс думайтны кöр да кытчö бы аслыс воштісьны челядьнас.
Кытчö сылö воштісьны?
Эз эшö тöд.
Тшӧтшӧритны - быдлаӧт ветлӧтны, кошшисьны, видзӧтчыны.
Любовь Косова-Старцева
Редактор рассказа Любовь Косова-Старцева:
"Ме мыйкӧ кери рассказ ладорӧ. Аслым бура оз гленытчы. Коліс бы эшӧ видзӧтны, да Виль год вӧтӧ, коккезӧс тальӧ. Долгсӧ дынам ог бы коль.
Концовкаыс дзик кузьӧв. Видзӧтӧ, может, ме не сідз кери. Ме эд асмознам висьтаси."