Таулыҡай ауылы мәктәбе спорт һөйөүселәрҙе бер майҙанға йыйҙы

Таулыҡай ауылы мәктәбе спорт һөйөүселәрҙе бер майҙанға йыйҙы. Бында волейбол, шахмат, шашки, өҫтәл теннисы ярыштары үтте. Сараны ауылдың әүҙем ир-егеттәренең береһе, физкультура уҡытыусыһы Ғәзиз Йыһанур улы Байегетов ойошторҙо.

Һауа торошоноң боҙолоп тороуы ла спорт һөйөүселәргә кәртә булманы. Мәктәп уҡыусылары, йәштәр, ошо ауылда тыуып үҫеп ҡырҙа йәшәүселәр ҡатнашты бәйгеләрҙә. Спорт залы уйынсыларҙың һәм көйәрмәндәрҙең ҡеүәтләү, хуплау, дәртләндереү тауышынан гөрләп торҙо. Көсөргәнешле волейбол ярышы көн дауамында барҙы. Һәр кем беренселек өсөн тырышты. Унда бөтәһе биш команда ҡатнашты.

Сәмле һәм ҡыҙыу бәйге һөҙөмтәләренә килгәндә, беренсе урын - Таулыҡай ауылы йәштәренең беренсе командаһына бирелде!

Икенсе урынға "Гагариндар" командаһы сыҡты.

Өсөнсө урынды Таулыҡай йәштәренең икенсе командаһы яуланы.

Дүртенсе урын "Таулыҡай егеттәре" нә, бишенсе урын "Ветерандар" командаһына бирелде.

Шулай уҡ иң яҡшы уйынсылар төрлө номинацияларҙа билдәләнде.

Зиһен үҫтереү, фекерләү ҡеүәһен нығытыуға ҡоролған мауыҡтырғыс ШАШКА ярышында 14 ир-егет ҡатнашты.

Беренсе урын Айбулат Сәғәҙәтовҡа, икенсе урын - Нәжип Салиховҡа, өсөнсө урын - Иҙел Сәғәҙәтовҡа бирелде.

Шахмат ярышында был уйынды яратҡан биш кеше ҡатнашты.

Улар уйланып ҡына, ентекле генә итеп уйнанылар.

Һөҙөмтәлә, иң шәп шахматсы тип Айбулат Сәғәҙәтов билдәләнде.

Икенсе урынға Рамил Салихов сыҡты. Өсөнсө урынды Нәжип Салихов яуланы.

Өҫтәл теннисы ярышында ла бәйгеселәр күп булды. Әммә Ғәзиз Байегетов иң етеҙе тип танылды. Ул беренсе урын яуланы. Икенсе урын Флүр Сәйетовҡа бирелде. Артабанғы урындарҙы Айгиз Исхаҡов һәм Айгиз Байегетов яуланы.

Көн дауамында барған спорт ярыштары үҙ маҡсатына иреште. Сара бик ойошҡанлы үтте.

" Ҡышҡы оҙон ялдарҙағы был бәйге икенсе йыл рәттән ойошторола. Уның маҡсаты - ир-егеттәрҙең ялын файҙалы һәм күңелле үткәреү, спортҡа һөйөү тәрбиәләү.

Һәр сара үткәреүҙә бағыусылар ярҙамы талап ителә. Ошо ярыштарҙа финанс ярҙам иткән Илгиз һәм Фәиз Байегетоварға, Нәжип Хәсәновҡа, Ғәфүр Сагинбаевҡа, шулай уҡ ярышта ҡатнашыусыларҙы йылы пирожки һәс сәйҙәр менән һыйлаусы ауылыбыҙ уңғандары Гөлсирә Сафина һәм Ләйсән Үҙәнбаеваға рәхмәт һүҙҙәрен еткерге килә", - тине спорт сараһын ойоштороусы Ғәзиз Йыһанур улы.

Афарин, таулыҡайҙар! Афарин, ойоштороусылар! Афарин, спорт һөйөүсе дуҫтар!

Икенсе йыл рәттән уҙғарылған, ауылдаштарҙы берләштергән был ярыш киләһе йылдарҙа ла дауамлы булһын!

Альбина Байегетова.