“Hech kim Grenlandiya borasida AQSHga qarshi chiqolmaydi” — Tramp yordamchisi
Prezident ma’muriyatining siyosiy masalalar bo‘yicha apparat rahbari o‘rinbosari Stiven Miller Grenlandiyaning AQSH tarkibiga kirishi Vashingtonning rasmiy pozitsiyasi ekanini ma’lum qildi. U Daniyaning ushbu orolga egalik qilish huquqini savol ostiga oldi:
“Asosiy savol shundaki, Daniya qaysi huquq bilan Grenlandiya ustidan nazoratni da’vo qilmoqda? Hududiy da’vo nimaga asoslangan? Grenlandiya Daniyaning mustamlakasi bo‘lib qolishi uchun qanday asos bor?”, dedi Miller.
Millerdan AQSH orolni qo‘shib olish uchun kuch ishlatish ehtimoli haqida so‘ralganda, u Arktikadagi harbiy operatsiya haqida o‘ylashga yoki gapirishga hojat yo‘qligini aytdi. Uning fikricha, hech bir kuch bu masalada AQSHga harbiy qarshilik ko‘rsata olmaydi.
