Дарагія парафіяне, паважаныя капыляне!
Углядаючыся ва ўбогую бэтлеемскую стаенку, у чарговы раз знаходжуся разам з вамі ў радасным здзіўленні, што Усемагутны Бог стаў дзіцем і менавіта такім дае нам Сябе пазнаць. Ён прыходзіць у свет як слабы, безабаронны Бог-Чалавек, якому патрэбна апека. Прыходзіць канкрэтна да нас, хоча быць намі прыняты і пасяліцца між намі (пар. Ян 1, 14). У нашы складаныя і неспакойныя з многіх прычын часы няхай святкаванне Божага Нараджэння будзе для нас усіх выклікам і заахвочваннем да дзейнасці дзеля супольнага дабра, да размовы, поўнай павагі, да прабачэння і станаўлення па-над усялякімі спрэчкамі і непаразуменнямі, якія – у святле Пана, які прыходзіць, – здаюцца неістотнымі. Няхай гэта будзе час адкрыцця годнасці кожнай асобы, да чаго нас нястомна заклікаў Папа Францішак, "бо нельга патрабаваць павагі да сябе самога без павагі да іншых; нельга атрымліваць, калі адначасова не хочам даваць".
З нагоды Божага Нараджэння жадаю ўсім дзецям, моладзі, сужэнцам, людзям, закранутым хваробай і цярпеннем, а таксама кожнаму з вас адкрыць зноў, што найвялікшым шчасцем для чалавека з’яўляецца клопат пра – часамі такую крохкую – прысутнасць Бога ў нашым жыцці і разуменне, што Яму ў дапамогу патрэбны нашы рукі і вусны, наша чулае сэрца і наш час, каб Народзіны Любові маглі перамяніць нас і жыццё нашых блізкіх.
Жадаю, каб новы год, які прыходзіць, прынёс толькі добрыя дні, пачуццё бяспекі і ўпэўненасць, што Божая Любоў спадарожнічае ўсім тым, хто на яе спадзяецца. Каб гэта быў год, поўны добрых хвілін і добрых людзей вакол.
Андрэй КАЛЯДКА,
ксёндз касцёла Святых Пятра і Паўла ў Капылі
Рождество в Копыле – праздничные пожелания от настоятеля католического прихода
