Ҡаршылыҡтарҙы еңә-еңә...
Шәмсетдиновтар бөтә һөйөү һәм хәстәрлектәрен ғаилә йылыһына мохтаж балаларға йүнәлтә...
Сит баланы ғаиләңә алып, уны тәрбиәләүгә бөтә күңел йылыңды, булмышыңды һалып, хәстәрлек менән тулған донъяны бүләк итеү һәр кемдең ҡулынан килмәй торған эш. Тап ошондай тәүәкәл аҙымға барған Гөлшат һәм Зәлир Шәмсетдиновтар Баҡалы районының Ҡамышлытамаҡ ауылында йәшәй.
Ир менән ҡатын оҙаҡ үҙ балаларын табып үҫтереү хыялы менән йәшәй. Тик яҙмыш уларға бындай бәхеткә өлгәшергә мөмкинлек бирмәй. Әммә Шәмсетдиновтар төшөнкөлөккә бирелмәй, улар бөтә һөйөү һәм хәстәрлектәрен ғаилә йылыһына мохтаж балаларға йүнәлтә. Балаларҙы ғаиләгә тәрбиәгә алыусы ата-әсәләр мәктәбендә уҡығандан һуң 2015 йылда үҙҙәренең буласаҡ улдары менән танышалар. Һигеҙ йәшлек Никита һәм биш йәшлек Евгений тәү ҡараштан уҡ уларҙың иғтибарын яулай.
Ғаилә башлығы Зәлир Мөәзип улы– ышаныслы һәм төплө аҡыллы, Себер тарафтарында нефть һәм газ тармағында оҙайлы хеҙмәттә сыныҡҡан, күпте күргән уҙаман. Уны ғаиләлә генә түгел, ауылда ла, коллективта ла хөрмәт итәләр. Ярҙамсыллығы, ғәҙеллеге менән ауылдаштары араһында абруй ҡаҙанған кеше ул. Гөлшәт Илшат ҡыҙы – йорттоң тотҡаһы, ғаиләнең ҡайнар йөрәге, Уның хеҙмәт һөйөүсәнлеге, мәрхәмәтлеге, күңел йылыһы һәр кемгә етерлек. Мәктәптә лә ҙур тырышлыҡ менән эшләүен дауам итә.
Балалар – ата-әсәнең ҙур ғорурлығы. Никита һәм Евгений төрлө яҡлап үҫешә. Кесе улдары Евгений мәктәптә яҡшы уҡыу менән бергә уның ижади тормошонда әүҙем ҡатнаша, донъяны танырға өйрәнә. Никита ата-әсәнең ышанысын аҡланы, ул - Ҡазан дәүләт аграр университетының 2-се курс студенты. Балаларҙың икеһе лә яуаплылыҡ тойған, дисциплиналы, маҡсатҡа ынтылыусан булып үҫә. Шәмсетдиновтарҙың тырышлығына бик яҡшы баһа был.
Ғаиләлә хеҙмәт һәм ял ярашып бара, мөһим мәсьәләләр бергә хәл ителә. Шәхси хужалыҡ, ерҙәге хеҙмәт, бесән әҙерләү, мал-тыуар ҡарау балаларҙа хеҙмәткә хөрмәт, берҙәмлек һәм яуаплылыҡ тәрбиәләй. Ата-әсә уларға йылы мөхит биреүҙән тыш, бик күп аҫыл ҡиммәттәрҙең ныҡлы нигеҙен бүләк итте: ярҙамсыллыҡ, хеҙмәт һөйөүсәнлек, бер-береңә ышаныс тойғоһо. Был йәшәү рәүешен улар үҙҙәренең киләсәк тормошонда ла дауам итер тип ышанабыҙ.
Фото: Ғаилә, хеҙмәт һәм халыҡты социаль яҡлау министрлығы сайты.
Беҙҙең МАХ каналына https://max.ru/gazetabashkortostan ҡушылығыҙ!