«Көслө булырға ваҡыт»: күмертауҙар ветерандарҙы йыйҙы
«Көслө булырға ваҡыт» девизы аҫтында Күмертау ҡалаһында махсус хәрби операция ветерандары ҡатнашлығында спорт фестивале үтте.
«Рәсәй спорты» дәүләт программаһының бер өлөшө булған сара Күмертау, Мәләүез һәм Көйөргәҙе райондары спортсыларын берләштерҙе. Сараны Күмертау ҡалаһы хакимиәте башлығы Олег Астахов, ҡала советы рәйесе Евгений Оськин, ветерандар советы етәксеһе Муаед Мәмбәтов асып, ҡунаҡтарҙы сәләмләне. Ярыш башланыр алдынан тантаналы рәүештә 14 уҡыусы йәш армиясылар сафына алынды.
Махсус хәрби операция ветерандары, ғаилә ағзалары гер спортында, йөҙөү, пауэрлифтинг, электрон винтовканан, дартс һәм бочча – боулингка оҡшаған уйын төрөндә оҫталыҡтарын күрһәтте. “Мөмкинлектәре сикләнгәндәрҙең спортта уңыштары ҡыуандыра. Мәҫәлән, Радик Йосопов республика МХО ветерандары составында әүҙем шөғөлләнә. Ҡышҡы спорт төрө буйынса Бөтә Рәсәй “Ватанды һаҡлаусылар кубогына бара”, - ти Күмертау ҡалаһында паралимпия спортына әҙерләгән тренер Владимир Казаков.
Фестивалдә ғаиләләге кеүек дуҫтарса мөхит хөкөм һөрҙө, ҡатнашыусыларҙы дәртләндерергә “Ватанды һаҡлаусылар” фондының урындағы социаль координаторҙары Наталья Селищева, Альбина Арыҫланова, Ләйсән Мәхмүтова, Анастасия Николаеваның килеүе лә шуны дәлилләне.
Ярыштар һөҙөмтәләре буйынса урындар түбәндәгесә бүленде. Тәүге урынды ярышты ойоштороусы хужалар – күмертауҙар яулаһа, икенсе һәм өсөнсө урынды Мәләүез һәм Көйөргәҙе районы командалары бүлеште.
