Манышты мәктәбендә халҡыбыҙҙың онотолмаҫ милли мираҫы булған «Биш ашыҡ» уйынын өйрәнеү буйынса оҫталыҡ дәресе үткәрелде

Манышты мәктәбендә халҡыбыҙҙың онотолмаҫ милли мираҫы булған «Биш ашыҡ» уйынын өйрәнеү буйынса оҫталыҡ дәресе үткәрелде.

Сара милли уйынды һаҡлауҙа һәм киләсәк быуынға тапшырыуҙа ҙур әһәмиәткә эйә.

Оҫталыҡ дәресе Асия Йосопова етәкселегендә ойошторолдо. «Алтын ашыҡ» буйынса республика чемпионаты призерҙары - Инйәрҙәң 2-се мәктәбенең “Шайморатов класы” уҡыусыһы Ислам Ғәлиәкбәров һәм Сәфәрғол ауылы ҡатын-ҡыҙҙар ойошмаһы рәйесе Гөлйемеш Янбаева тәжрибәләре менән уртаҡлашты. «Һомай» медиастудияһының йәш хәбәрселәре Әмилә Янбаева һәм Зөлхизә Йосопова уйында ҡатнашыусылар менән әңгәмәләште. Уҡыусылар - Руслан Исмәғилев, Айназ Абдрахманов, Айназ Дәүләтов, Йәмилә Мирасова, Аиша Сәйетова һәм башҡалар уйындың нескәлектәрен ҙур ҡыҙыҡһыныу менән өйрәнде. Уларҙың күҙҙәрендә – яңы белемгә ынтылыш, күңелдәрендә – милли уйынға ҡарата һөйөү уты балҡыны.

Ағинәйҙәр ҙә был мөһим саранан ситтә ҡалманы. Уйындарҙа ла ҡатнаштылар, мул сәй табыны ла әҙерләнеләр.

«2026 йылда Инйәрҙең 2-се мәктәбендә үтәсәк «Биш ашыҡ» буйынса район чемпионатында ҡатнашырға хыялланабыҙ!» – тине сарала ҡатнашыусылар.

Оҫталыҡ дәресен ойоштороуға ярҙам иткән мәктәп етәкселегенә, уҡытыусыларға, милли уйынды өйрәтергә килгән Асия Рим ҡыҙы менән Гөлйемеш Салауат ҡыҙына һәм Инйәрҙең 2-се мәктәбе уҡыусыларына оло рәхмәтебеҙҙе белдерәбеҙ!

Манышты ағинәйҙәре.