Кәрәкле белгестәр әҙерләү – мөһим бурыстарҙың береһе
Рәсәй мәғариф министрының беренсе урынбаҫары Александр Бугаев Өфөнөң Вуз-ара студенттар кампусында һәм М. Аҡмулла исемендәге Башҡорт дәүләт педагогия университетында булды.
Кампуста Рәсәй мәғариф министрының беренсе урынбаҫары Александр Бугаев ӨДНТУ, ӨФһТУ һәм БДМУ-ның заманса лабораторияларын юғары баһаланы. Һуңынан М. Аҡмулла университеты ректоры Салауат Сәғитов менән бергә юғары уҡыу йорто институттарына юлланды.
Сәфәр Башҡортостандың төҙөлөш отряды хәрәкәте тураһындағы фотокүргәҙмәне ҡарауҙан башланды. Шулай уҡ ҡунаҡты “Добро” үҙәге эшмәкәрлеге менән таныштырҙылар. Ул - 2013 йылдан 575 ирекмәнде берләштергән һәм балалар өсөн социаль акциялар үткәргән университет үҙәге.
Физика, математика, һанлы һәм нанотехнологиялар институтында декан Азат Йосопов Александр Бугаевҡа наноэлектроника лабораторияһы һәм наносенсорика йәштәр лабораторияһы эшләнмәләрен күрһәтте.
Ректор Салауат Сәғитов билдәләүенсә, юғары уҡыу йорто фәнгә айырым баҫым яһай: 2025 йылда Мәғариф министрлығының дәүләт заданиеһы буйынса проекттар күләме 53 миллион һум тәшкил иткән.
Физик культура һәм кеше һаулығы институтында ҡунаҡтарға федераль программа буйынса йыһазландырылған кабинеттар күрһәтелде, унда студенттар робот-тренажерҙарҙа һәм заманса ҡорамалдарҙа беренсе ярҙам күнекмәләрен өйрәнә.
Александр Бугаев М. Аҡмулла исемендәге Башҡорт дәүләт педагогия университетының йылдам үҫешеүен билдәләне һәм бының өсөн юғары уҡыу йортоноң ректорына һәм профессор-уҡытыусылар составына рәхмәт белдерҙе:
– Һәр ваҡыт килеп, яңы нәмә күрәһең. Әммә иң мөһиме – студенттарҙың, аспиранттарҙың күҙҙәре яна. Был уларға бында ҡыҙыҡлы булғандың иң яҡшы күрһәткесе.
Министр урынбаҫары патриотик тәрбиә биреүҙе мөһим йүнәлештәрҙең береһе тип атаны.
– Кәрәкле белгестәр әҙерләү – мөһим бурыстарҙың береһе, М. Аҡмулла университетында һәм Өфөнөң Вуз-ара студенттар кампусында бөтә матди-техник база быға тап килә, бөтә шарттар ҙа булдырылған, – тип билдәләне Александр Бугаев.
Фото сығанағы: Башҡортостан Хөкүмәте.
