Икки күн устата оскуолабыт иһигэр хомус тохтообокко дьүрүһүйдэ
Покровскай куорат 1-кы №-дээх орто оскуолатыгар Дьокуускай куораттан Аан дойдутааҕы хомус музейын уонна киинин үлэһиттэрэ Туйара Жиркова, Алена Платонова Хаҥалас оскуолаларыттан 200-кэ оҕолору түмэн хомус тардыытыгар үөрэттилэр.
Хомуска үөрэтиэхтэрин иннинэ 20 анал байыаннай дьайыы кыттыылаахтарын оҕолоругар Уус Алдан ууһа Александр Шепелев охсубут хомустарын бэлэх ууннулар. Маннык тэрээһин “ Хомус эйгэтэ” диэн бырайыак чэрчитинэн өрөспүүбүлүкэ баһылыга Айсен Николаев, Үүнэр көлүөнэ сайдыытыгар туһаайыллыбыт фонда өйөбүллэринэн өрөспүүбүлүкэ оройуоннарыгар үһүс сылын ыытыллар.
Икки күн устата оскуолабыт иһигэр хомус тохтообокко дьүрүһүйдэ. Тэрээһин аһыллыытыгар оройуон үөрэҕин салалтатын начальнига Юрий Шадрин эҕэрдэ тыл эттэ уонна иитэр үлэҕэ саха төрүт култууратын, чуолаан, хомус тардыытын сайдыытыгар сүрүн болҕомто уурулларын бэлиэтээтэ.
Спиридон Шишигин, Покровскай куорат 1-кы №-дээх орто оскуолатын дириэктэрэ.
