Беренсе ҡар ятып ҡышҡы һыуыҡтар килеү менән Тайҡаш ауылында һуғым өмәләре гөрләй башланы
Ҡариҙел ауылдарында һуғым өмәләре беренсе ҡар ятыу менән шаулап үтә башланы. Туған-тумасалар, күршеләр һәм ауылдаштар бер-береһенә булышам тип иртүк хужаның йортона килеп етә. Самауарҙан бер сынаяҡ сәйҙе йығып эсә лә ирҙәр эшкә тотона.
Йола булғас йола булһын, абруйлы, йәки кемдең ҡул арты еңел, ите тәмле була, шул инде ҡышлап сыҡҡан малды сала ла инде. Ауылда ундай ир-егеткә ҙур ихтирам менән ҡарайҙар, уны данлап йөрөтәләр. Һуңынан инде малды тиреһенән айырып, эсен ярғас ҡатын-ҡыҙҙар көлөшә-көлөшә биҙрәләрен тотоп, йылы быйма кейеп, шәлдәрен урап үҙ эштәрен башҡарырға сығалар. Ә бала-сағаға иң «ауыр эш» йокмәткелә: малдың ҡойроғон тоторға, эттәрҙе, ҡош-ҡорттарҙы ҡыуып торорға. Шулай ҙа улар инәйҙәре (әсәйҙәре) менән йылға буйына төшөп, мәке янында бер-береһе менән ярышып эсәк тапайҙар. Үәт исмаһам күңелле күренеш!
Ата-бабаларыбыҙҙан ҡалған был изге йола бик күп ауылдарҙа ойошторолған кеүек Ҡариҙел районы Тайҡаш ауылында ла һүрелмәгән. Яңыраҡ был эш Миңлеәхмәтовтар менән Зиннуровтар ғаиләһендә атҡарылды.
- Беҙ йыл әйләнәһендә бер-беребеҙгә ярҙам ҡулын һуҙып, туғанлыҡ ептәрен өҙмәй, күрше хаҡы тәңре хаҡы тип, ярҙам итеп йәшәйбеҙ, - ти Йәмилә Әмир ҡыҙы.
Тайҡаштың ут күршеләре, йәйен бесән, утын, көҙөн ҡаҙ өмәһе, ҡышын һуғым һ.б. эштәрҙә бер-береһенә ярҙамлашып торалар.
-Бер-береңә терәк булып, аңлашып йәшәгәндә генә тормоштоң матурлығы, ауылдың йәме бар, - ти Фәнис Миңлегәрәй улы.
Зиннуровтар менән Миңлеәхмәтовтар ғаиләһе ауыл тормошонан да ситтә ҡалмайҙар. Төрлө мәҙәни һәм тирә-яҡты төҙөкләндереү сараларында ла әүҙем ҡатнашалар. Апайҙар аш-һыуҙарын бешереп табын ҡорошорға ярҙам итһә, ә ирҙәр инде көрәк-һәнәк, балта тотоп урам өмәләрендә ҡатнашалар.
- Был ике ғаиләнең уңғанлыҡтары, һәм ауылдаштары өсөн өлгөлө булып йәшәүҙәре бер кемгә лә сер түгел. Кәрәк саҡта йүгүреп килеп етәләр. Көстәренән килгәнсе ярҙам итәләр. Беҙ улар менән ғорурланабыҙ һәм оло рәхмәттәребеҙҙе еткерәбеҙ, - ти ауыл мәҙәниәт йорто методисы Линиза Муллаярова.
Күршеләрең булғас үҙеңдән дә яҡшы булһын, тип ололар юҡҡа әйтмәгән. Тайҡаштарҙың бөтә ауыл менән ошондай дуҫ, татыу йәшәүҙәре районыбыҙға өлгө булып тора. Афариндар, ҡариҙелдәр!