Кырган-ачам дээрбези

Авам, ачам одаглангаш, чалгый пашка

Арбай, тараа элчип-селчип хооргулаар.

Былгааш-биле олуй-солуй былгап-былгап,

Быжа бээрге, деспилерже долдур эзер.

Согааштыва кызыл-тасты өйлей ургаш,

Шоңнай бээр мен. Чиңге-тараа соктай бээр мен.

Арбайны-даа, тарааны-даа челбээн соонда,

Адыштапкаш, кармактапкаш, халып каар мен…

Өөрүм-биле кудумчуга ойнап-ойнап,

Өгге келгеш, даанганы таан таптыг,

Кырган-ачам төгерик даш дээрбезинге

Кыйырадыр далган тыртып оргулаар мен.

Тоол шагдан салгал дамчып чедип келген

Тодуг-омак кырган-ачам дээрбези,

Алыс бодуң соок даш бол, чолуң чаагай –

Азыракчы, чемгерикчи буянныг сен.

12.12. 25

#енданбс